IRUHNI BEBAY sastera lampung 'bandung'

IRUHNI BEBAY
Bandung Semacca Andanant

Tabik pun nabik tabik, sikinduwa nyuwara, kantu mak kena dipik, kilu mahapso juga, ajo karangan cutik, haga numpang nyembuka, ratong jak hati lunik, say nyimpon dilom dada, radu ramah say ramik, si bebay bukereja, dang lagi tipukicik, hunjakni ki ticela, asal ya guway betik, mawat nyapang cempala, bupiil delom hurik, nutuk ijah agama, ganta semapu rimbik, iruhni bebay pura, wat cambur dipelitik, wat munih say usaha, wat say mawat bukelik, taru dilamban riya, nguyunkon sanak ramik, sina tugas say muliya.

Bebay dang tipusakik, dang munih tipuhina, hejongkon disay betik, di pepadun say muliya, kewajiban hak hurik, sama retop di kita, tulung tan layin cutik, ngebangun rumah tangga, bebay napasni hurik, ngeramikkon duniya, ngelekik panas kulik, maring mak ngedok ngeba, ki tiyan mak muredik, pulelung jama kita, tumban tenerok hurik, lemoh mak ngedok daya, ya alloh mati sakik, ki radu gegoh rena, cadang adat ram hurik, ki bebayni celaka, betik jahalni hurik, sunyinni wat di iya, ya mula payu kantik, ram jejama ngandan ya, titaway betik-betik, nutuk ijah agama, piil hurik dang tepik, say najin dipa juga, jama wari sekelik, wewah-wewahdo muka, dang kala tan muredik, ram segok mak nyembuka.

Kidang renoda kantik, puhaguk bebay pura, kiluku ikah cutik, di tiyan say bukereja, dangkung pay tibabinjik, kipak ngulang belanja, regai kipak cutik, tiyan inggoman kita, banguk dang gubak-gabik, goh samang dilom rimba, timbaldo betik-betik, ki inggoman ram nanya, kenyin nyelamat hurik, dilom burumah tangga, dang sebangkil di kicik, sebelingotan di cara, nayah bebay say ramik, tiyan say bukereja, lupa jejoran hurik, dilom burumah tangga, mak lagi kena dipik, sipa tutukan kita, tisanggah sipa kicik, tilawan sipa cara, kantu payudo kantik, mahap ki salah cara, dangkung pay hati sebik, ki misal mak bukena, ajo jak hati lunik, suwarani nyembuka, tulung akuk say betik, pakay kantu buguna.

Tabik.

Jakarta, 29 sept 2013