MIDANGDO NIKU sastra lampung 'hahiwang'

MIDANGDO NIKU
Hehiwang Semacca Andanant

Lapahdo niku midang, habang keliling duniya, dangkung pay nyinta mulang, ki mangkung nayah teda, sakikga sikam mandang, ki niku pagun dija, rawang luh niku miwang, sampay ngebaluk mata, nasipmu liwan malang, taru dipekon tuha, goh kayu dipumatang, ngeranggas mak buguna, balakdo kidah batang, tuwoh ditengah rimba, kipak balak dibatang, kidang mawat burega, nasipmu sangun sumang, mak gegoh di inday kanca, sunyin segala kurang, ketutuk sanak papa, mak ngedok say ngebabang, puwari induh dipa, ibaratni kaliyang, tumban mawat tihaba, lapahdo niku midang, dang lagi riwa-riwa, bulat tikat ngejimpang, sirok redok didada, dua mak kurang-kurang, kiriman sikam dija, kekalaw niku senang, pawar segala-gala.

Ki niku lapah midang, besi ruwa dang lupa, selokkon dilom sinjang, pikiran rik tenaga, lelaja tepik di rang, manuk bebay nyembuka, dang mudahga nyembekang, astawa nepas dada, sangun ki hurik numpang, nayah hulun mak suka, semapu sani sulang, nyanikon ram celaka, kipak pikiran cadang, musaw dada dang lupa, kilu tunjuk say terang, di tiyan say kuwasa, dang milih api sulang, tiguway api juga, kipak ya injuk malang, beduwa mak cigana, sukur jadi pedagang, usaha mudal hawa, kipak sakik tisandang, hulun jadi percaya, ki radu nungga senang, ingok lapahan kita, dang sampay salah jimpang, mak urung ram celaka, dang neram lupa mulang, ki wat helok hantara, kipak mak dapok manjang, pinsan gawoh kak buka.

Sukur ki dapok mulang, bangun negeri kita, kipak mak dapok nyulang, andan say wat di kita, basa lampung dang cadang, hunjakni ki budaya, dang mani radu midang, lupa asalan kita, cawa lampung kak mulang, injuk pak cawa cina, butupung mak businjang, bukaway mak nyelana, anodo lampung cadang, mahap pay say mak riya, say najin kita midang, dang lupa di kelama, tabik-tabik pay kundang, di neram keunyinna, kantubang mak buhelong, diwayak sikinduwa, ano karangan cadang, simbinkon ki ya riya, lapahdo neram midang, niyat ngerubah duniya, dang tepik pak sang rangkang, ngerubah nasip kita, kanahdo neram mulang, ki radu hurik jaya, dang nemah mak busulang, takdir tuhan diipa, sepokdo dipado rang, heno kewajiban kita.

Tabik.

Jakarta, 22 sept 2013