LELAKUN HURIK DI KOTA sastera lampung 'bandung'

LELAKUN HURIK DI KOTA
Bandung Semacca Andanant

Bismillah mula-mula, tabik buribu ampun, hambamu mak budaya, di Niku kilu tuntun, semapu di kehaga, asing guway tilakun, kipak mak patut cara, pagun juga tisusun, mak lagi hawok cara, induh jahal rik buyun, kipak jadi perkara, dilom hurik buhimpun, pagun tiguway juga, say peting dapok nimbun, kidah masalah dusa, kanah ram kilu ampun, lupa jama tetangga, ingok dilom lelakun, tangih haga jejama, dilom hurik buhimpun, asal mak ngemik ciga, duli pak guway ngarun, asal pawar dimata, nedos sakik butimbun, reno hurik dikota, semapu dilelakun, kipak ngelakukon dusa, pagun tianggop buyun, ngebudi rik ngedaya, ngeramut makni hulun, kipak naruhkon nyawa, pagun juga tilakun.

Merindang dipa-ipa, bebay bakas bulakun, bugawul bibas nana, lupa jama penuntun, agama induh dipa, piil dalih sesikun, ram hurik dunna-dunna, guway  jahal rik buyun, muli meranay ganta, semapu dilelakun, sumang nihan jak saka, ngedok adat penuntun, ki namu mejong sila, dilom adat say buyun, ki ganta radu bida, hawok paha rik tundun, janjiyan tungga dipa, ditaman say bubumbun, ram languy jama-jama, mandi sekekit tundun, ki mak mit rang tamasa, hotel bususun-susun, say ngedok bintang lima, ram nogokko lelakun.

Mula dang hiran ganta, sanak bajang bulakun, radu panday diseruga, kipak guway mak buyun, layin antak dinyuba, kantu risok tilakun, cadang andah narkoba, rik lakun say mak buyun, kantu hari-harido kanca, guway jahal rik buyun, sekelik ram tijaga, awas jaga lelakun, hurik ditengah kota, mak ngedok say mak buyun, ki panday ram dicara, munyayan dilom santun, ulih hurik dikota, dang hina diguway buyun, piil pesenggiri tijaga, dang asal guway ngarun, ki ram malas kereja, sakik malang butimbun, ram jadi jarma hina, jadi yeyuhni hulun, kantu lehot dikanca, say haga mit de pekon hulun, dang ngusung manuk lelaja, jaga sopan rik santun, besi ruwa dang lupa, dilom guway say buyun, ingok lapahan kita, dipa langik ticecun, dang neram nyela bida, relok dilom lelakun, kanah mulang mak neda, pawar mulang dihulun, kantu mahapdo kanca, layin pay nyak say buyun, kantu lapah jejama, ngiwak guway say buyun.

Tabik.

Jakarta, 02-02-2013