"LAMBAN KIRAK"
Mak dapok ku itung-itungko lagi perasaanni hatiku ganta. Katan rik sakik, kesol rik geregot sunyin nyesok di dada ngelawor ngesay mak kenantuwan, haga beka rasana. Raskala nengis rik mandayi inggoman ram ngedok andanan sumang. Gegoh nitimbak guntur ditengah rani reno hancur rik layawni perasaan hati. Kekala haga pak ngeraduko hurik di tihang gantungan kenyin tenemuwan hurik mak lagi jadi baban. Kekala munih terok pak lijung jawoh-jawoh say pokni mak tipandayi, jawoh jak keramian say mak lagi dapok tihubungi.
"Mawat nyak nunang, haga api ku lagi? Ya hudi kantikku, rik diwaktu sekula, rik kereja...sikam marok biyasa...." hino selalu jadi timbalan kapan kak titanya. Kidang api tiyan cak selalu telponan, chatingan unggal waktu. Kapan kak lagi telponan tiyan lalang-lalang, kapan kak jak chatingan geluk-geluk tihapus. Lamun sekedar nanya kabar halok mak unggal waktu setelponan rik chatingan, kidang hijo selalu sampay lupa di guway.
Induh....ach rasana hancur nihan hatiku. "Ki nutuk perosni hati kantu nyak radu tandak lebon induh sungi ulih lijung ubatni sakik hati" heno pay kinjuk hani hati. Ulih rasani radu mak lagi tahan rik injuk layin dibumi lagi nyandang temuwan macom sinji. Kidang heno mak juga jadi ngeba petika mata nontong pudakni sanak ruwa rik tebinta hulun tuha sereta puwari. Rasani mak tega ngejimpangko cukut ngepikko derita di tiyan sementara nyak lijung ngebatok sakik hati. Tiyan jadi taruhan cadangni bulambanan, api hani rompok.
Bulambanan tibangun tujuwanni kenyin angangon ram rintok rik hurik ram ngerasa bahagiya. Sebabangan rik sepenyinan jadi modal awal ngebangun pelambanan nibarongi munih saling percaya rik ralis [jujur] delom segala guway. Mak bebuhungan apilagi "mayin tundun" ngehaguk pasanganni. Ulih mak dapok tibayangko semisal mak ngedok lagi rasa kepercayaan rik keralisan dihantara pasangan ram, mari api retini bulambanan? Api gunani ram titayuh rik tiduako, tikakanko munyan sambil bukilu kekalaw hurik ram mulapang rik mugandang, rintok angangon, munyay sereta murawan selalu delom jenongan tuhan ilahi robbi. Nisaksiko minak-muwari ramik say turuk iruh rik ngaminko kiluwan ram delom sesumbahan. Kekalaw api say jadi niyat rik hajat ram delom bulambanan kedoloran. Reno kekira tujuwan dimaknani bulambanan say tibangun ram.
Kidang layin, nayah ram tano lupa andah majuni tehnologi rik inpormasi. Ram kelansungan radu mak lagi ngindahko kaidah-kaidah bulambanan. Mak lagi ngedok rasa siri rik halok ganggu apilagi ki rasa malu. Ram ngerasa bibas mak ngedok say ngebatas. Ram ngerasa injuk lagi mengura rik mesanak. Ram mak ngerasa ki hurik ram radu metuha tesirok di sumpah janji setiya lom say gelarni bulambanan. Kelot pahik, bangik sakik merupik rik mugandang ram radu bujanji tisandang jama-jama. Ram layin lagi tenggalan, hurik ram radu wat kebuwak. Kedawni yado anak inggoman ram.
Mak tipungkiri lagi kemajuwan jaman, inpormasi rik tehnologi lamon say salah kaprah. Mudahni komunikasi nyanikon neram mak ngedok hanggan. Di medsos induh ya facebook, BBM, Whatsapp rik say barihni lamon nihan say mak gegoh dikenyataanni. Barang mawat tiwatko, barang wat timawatko. Nayah say tidaya, lupa diri mak panday lagi di piil pesenggiri. Bebay nyepok ragah, ragah nyepok bebay padehal tiyan radu ngedok anak kajong. Lamon say nanjarko poto seksi seulah-ulah juwalan kaway. Reno munih setatus-setatus lebay rik alay say titulis di sesay facebook. Mak mikirko akibatni. Alasan kenyin mak ketinggalan jaman. Hujungni bubabah tunggak-tedoh dalih begegurawan jadido say gelarni "merindang/perselingkuhan". Tabiiik-tabiiik jawoh kallah, perda ram bukilu kalaw ram santor dilom bimbingan rik jenonganni Alloh swt. Ulih gumah pelambanan tano say cadang ulahni medsos. Reno juga muli rik sanak ngura nayah say jadi korban penipuwan rik perdagangan manusiya.
Tabik.
Jakarta, 01 mei 2017
Tidak ada komentar:
Posting Komentar