DIPIKKO BAPAK MATI
Hahiwang Semacca Andanant
Ngederum kayu rungkak, di cukutni pesagi, api lajuku bapak, depikko niku mati, goh kayu rungkak suwak, cabut anjak bakakni, malang anakmu bapak, nyandang bagiyan sinji, ratong kabar ngedi nyak, tegah mak tipandayi, nyawako niku bapak, radu mak ngedok lagi, disan nyak tikedengak, badan gonggong mungingi, banguk mak dapok tekak, tekacay say dijari, nyak meru hiwang henguk, injuk layin di bumi, disan pudakmu bapak, telintas ngegurawi, kimut sengih muhanjak, kahutmu netay biti, kahutmu di nyak bapak, mak ngedok bandinganni, najin duniya berak, inton emas jadi ganti, pagun bacakku bapak, say jadi matarani, say ngeni siyar di nyak, delom hurikku sinji, api lajuku bapak, ki niku mawat lagi, nyak tepik tilah kirak, cadang kejuju api, sakik anakmu bapak, haruk di lambung bumi, mintarmu ngepikko nyak, tangguhmu dilom hati, ulih nyak mak diliyak, jawoh di seberang dudi, disan nyak tambah kirak, hancur rasani hati, bapak lapah ngepikkon nyak, mawat hak ku jemani, gegoh tisayak~sayak, sakik nihan rasani, hurik kelebonan bapak, goh lapah tengah bingi, jemimpang pureradak, mak nantu dihagukni, segala sugih kirak, urung mawat mejadi, butanya pay nyak emak, laju sunyin puwari, adil kodo pay tuhan, ki pasalni goh reji
Piyuni kayin handak, bantalni tanoh guci, pedom layin tigegak, gincing dihimpit bumi, ya alloh niku bapak, mati sedih nontongni, tikanyap kapan minjak, hiyon pedom sendiri, ki patut mawat nyimbak, haga nyak nyusul niku, sakikga di nyak bapak, tepik sasar di niku, api dayaku bapak, mak guway nampon dagu, batuy hiwang ku rambak, miwang mak taru~taru, mak lagi niku bapak, naway ngujar diriku, dipa marahmu bapak, ki nyak salah di laku, ya alloh kidah bapak, malang nihan tenemu, repa nyak haga minjak, ki kelom manjang waktu, tilah hulun muhanjak, tatepay dalih nyuhu, tapos kenayani di nyak, si haruk pudedayu
Api haga lajuni, cambay rubuh junjungan, lelayang putuk tali, jukung patoh kayuhan, hanipi lebon reti, reno ki injuk sekiman, hayawanku mak lagi, lebon arah tujuwan, bapak kahutku lawi, radu dipanggil tuhan, tinggal nyak say di bumi, mawat ngedok say ngandan, buhiwang unggal rani, repa lajumu badan, sekelik ahli wari, induh dipado jengan, nyak tepik mak dipuhari, goh jukuk dilom pulan, hurik burani~rani, wat risokku mak mengan, alloh tuhanku robbi, mati malangmu badan, nayah hulun mubeji, mak nihan wat kasihan, niku bapakku lawi, kalaw diandan tuhan, lapang kiwah kuburni, delom hanggumni tuhan, yakin nyak dilom hati, bunjak kahutni tuhan, mula niku mit dudi, ngepikko sikam kaban, ku irlasko dihati, halok radu bagiyan, kalaw tabah nyandangni, tepik delom munyayan
Tabik.
Jakarta, 190517
Tidak ada komentar:
Posting Komentar