LUWOT-LUWOT, LAYIN KI BUWAK LEPOT KANTU TEMULAWOT

LUWOT-LUWOT, LAYIN KI BUWAK LEPOT  KANTU TEMULAWOT......

Agi Semacca Andanant

Induh diya api ki hak retini tulisan judul say diatas kantu nyin dang mak ngedok judul gawoh rik nyin nyanikon neram injuk penasaran cutik api isini tulisan sinji. Ulih ki say nulisni makdo panday haga nyusun sapaykon cawa say helaw injuk tulisanni wartawan hunjakni ki gegoh tulisanni penulis handal. Repa mak riya? Ulih segala mudalku mawat. Ajo aki nulis hijo riya lagi ku bebani ubakon, ulih nyak panday hanggan ipa kemampuwanku dilom nulis. Jadi ki wat say ngajak sebangkil, sesindiran apilagi silik cawa tantu bacak nyak nyimbin mena jak nengah kidang tumban. Reno kipak hani lagu “nyepok tindiran” dilom musik peting tunggal.

Kantu payu. Semangkung tulisan hijo kejung tirangkay mak cigani sikinduwa haga netabik pay puhaguk neram rumpok keunyinna. Puhaguk ahli bahasa, sastrawan, budayawan, kama tamak kehulu [tukang keritik], laju munih jama tiyan say lagi gesit ngebila mati-matiyan demi kemajuwan bahasa neram, bahasa lampung. Ulih sapa lagi say haga menyin rik ngeharikon bahasa neram ki mak neram tenggalan. Sapa lagi say haga iwoh jama sastra rik budaya ram ki mak neram sayan juga.

Ampay-ampay hijo nayah rik lamon temon ku pastitiko diduniya maya, induh diya dihanggan setatus fesbuk, catatan ataw di forum-forum gerup ngereributkon tulisan huruf r [ra] dilom penulisan  kosakata bahasa lampung. Wat say sekedar nanya wat munih say terok panday. Wat say nahan sebangkil wat munih say ngadu piil. Induh podor huluku ki ngepapenyin masalah kemanno. Radu jak saka guway hijo kidang ajo bang mecul luwot. Rupani bahasa lampung mulay mansa “perhatian serius [iwoh setatuhu]” jak tiyan say ngedok kepentingan rik iwoh jama kemajuwan bahasa lampung.

Yado Udo z karzi jelema say mak asing lagi dikalangan sastra lampung. Sapa say mak panday rik mak kenal jama ya seniyor di koran Lampung post. Ia ninobatkon tiyan rumpok jadi jamma penggagas rik manusiya pertama penyair modern bahasa lampung. Diculukni radu pepira buku say radu titerbitkon tentang lampung rik kelampungan. Dihantarani Mak dawah mak debingi, Mamak kenut rik Tumi mit kota. Mak tiragukon lagi iwohni udo ngehaguk kemajuwan bahasa rik budaya lampung. Ya munih manusiya say bani ngererak aturan rik kaidah pepuisian saka dilom sastra lampung. Dilom bebuku kelampungan karyani ya selalu ngepopulerkon  makay hurup r [ra] say jadi pengganti hurup kh/gh/gr dilom bahasa lampung. Kipak nayah sanggahan rik tahil anjak kama tamak kehulu ya tetop nerulak rik ngeras hulu bahwa api say niguwaykon ya dilom penulisan hurup r [ra] sebagay peganti hurup kh/gh/gr yado benor. Mak tanggung-tanggung ya buargumentasi mulay jak hasil kajiyan ahli bahasa togok karya akademisi jadi reperensini. Semisal karya  HN Van der Tuuk, prof Frederik, Ir Irfan Anshory, Prof. Hilman Hadikusuma dan Junaiyah HM.

Sebenorni Udo layin ki hak esay-esayni manusiya say makay hurup r penggantini hurup kh/gh/gr dilom nuliskon karyani. Disan wat FITRI YANI, OKY SANJAYA, ASARPIN rik say barihni. Tiyan kemanno ikah nginjam jak tiyan rumpok say radu mena nulis makay hurup r dilom nuliskon hurup kh/gh/gr. Sapa tiyan kemanno? Mak barihni ki mak tamong kajong rik tuyuk turing ram tenggalan dikala tumbay. Suka mak suka tiyan radu mena ngerangkayko hurup hino jadi senimbang jama anak umpuni.

Sikinduwa  ngerasa tehakik [salute] ngehaguk mamak Paja fc pelita jaya say radu nyani catatan say judulni KUPPA KAPPIS KUPPA KAPIS... Disan sedea no radu ngekay beditko sereta ngeni ram panday goh repa bahasa lampung say benorni. Bahasa lampung say busabdu rik basa lampungdo say makay hurup kh/gh/gr layin r. Dilom catatan hino wat nihan say komentar sebangkil bahwa penddapatni say paling benor.

Ngehaguk Diandara natakembahang sikinduwa bangga juga radu ngeni damar rik hinar dilom penulisan cawa say benor dilom bahasa lampung. Sedea no radu ngekay-kekay sunyinni dalil say patut jadi acuawan neram kak nulisko cawa dilom bahasa lampung makay hurup kh/gh/gr. Ram patut bangga jama beliyaw no say radu iwoh jama kemajuwan bahasa lampung. Ulih ki nurut ya, ram perelu nunjukko jatidiri neram sereta ngakuk kearifan lokal. Patut tikeni kelimpu ruwa pakayni sedea no.

Kidang haga nabik tabik pay luwot sikinduwa ngehaguk kuti rumpok keunyinna. Sikinduwa dija mak mihak disapa-sapa, mak mihak jama Udo mak munih mihak jama Diandra, tabik pay sikiduwa dija nulis pakay hurup r[ra] layin kh/gh/gr. Wat alasannku menapi bang makay hurup r?. Sikinduwa terok tulisanni mudah tibaca, tipahami rik mak lamon rimbik[sederhana]. Menapi bang riya? Ulih ki nyak nulis pakay hurup kh, hani tiyan say makay hurup gh acak mak makay gh. Reno munih ki nyak nulis pakay hurup gh hani tiyan acak mak makay hurup gra hani tiyan say makay hurup gra. Kenyin ngejambati rik ngakuk tengah-tengahni mula sikinduwa makay hurup r rik tibaca sesuway jama hurup say dipakay jama pembacani. Halok reno mula tiyan tumbay menapi bang makay hurup r.

Lebih jawoh sikinduwa ngedok pendapok, ngehaguk puwari ram say makay dialek o ki dapok ram nulisni gegoh mak cigani. Ulih ki dilom hakikatni bahasa neram sangun gegoh ikah penyawani say bida. Misalni cawa; niku, sigor, haga, beli. Cukup bagi tiyan tibaca nikew, siger, hagow, beley. Mak usah ngerubah tulisanni. Ulih ki tipenyinko ikah diujung suku kata say duri say bida dilom penyawani. Jadi kantu puwari ngehalu tulisanku mak usah pusing-pusing baca gawoh sesuway jama penyawa kuti.

Huncukni cawa payu ram jejama ngehaguk kuti rumpok say patut, say iwoh jama bahasa rik sastra neram ngerumusko repa say benorni haga kelajuwan bahasa lampung. Haga tibatok ram dipa. Haga mugegay rik mulesay repa jak kita. Haga rutol rik merimbol haga jak kita juga. Makin hak ram injuk gamba. Mak ngedok say nyadangkon bahasa neram. Sunyinni repa jak ram.

Tabik.17/01/2014