"PEPANCUR"puisi tradisional lampung

"PEPANCUR/WAWANCAN" puisi tradisional lampung

oleh Semacca Andanant pada 31 Agustus 2010 jam 3:03

"BUTATTAH"

Haga nabik tabik pay
Di neram keunyinni
Butattah haga timulay
Canang radu kebunyi

Minjak nyak laju manjak
Cecok di lambung batu
Sapa ngeliyak kedengak
Sareh nyayang halinu

Sikinduwa jo ganta
Nikayun tiyan rompok
Tiyan rompok say dija
Punyimbang delom marga

Ku tulak sikinduwa
Ku ucakko mawat panday
Kidang payudo riya
Kenyin ngelajuko guway

Riyah riyah ki dawah
Kakunang kak debingi
Ki kak mansa perintah
Tisesat kipak mati

Nyom sinyom lalang sinyom
Ipon tandok suwasa
Lamon hulun say nalom
Kidang ya mawat dija

Muhujaw niyaw tiyaw
Kayu di tengah huma
Butattah kidah iyaw
Mak panday halok cara


...Reno diya pun ram rompok perda nengis. Si ragahni haga tikeni adok BATIN SEBERAK JAGAT. Si bebayni haga tikeni adok BATIN JUNJUNGAN JAGAT. Reno diya pun ram rompok perda nengis....


Sukur ki radu panday
Lehot sikam tah salah
Si radu muli muranay
Jak tano bebay ragah

Jejama ram budu'a
Bukilu jama tuhan
Kekalaw geluk mansa
Nikeni keturunan

Anak soleh soleha
Nutuk ijah rik taway
Sepenyinan di cawa
Setutukan di guway

Seluwang selom di way
Layin sepok sepo'an
Duli kalah di bebay
Bakas pagun junjungan

Taru pay antak ija
Wayakni mawat lagi
Kantubang salah cawa
Mahap jama puwari

Nudani tupay tanoh
Kena semetik lihay
Jak tano togok jajemoh
Adok haga tipakay

...Reno diya pun ram rompok perda nengis...

Negeri semaka 31 08 2010

"LEHOT DI ANAK" sastra lampung 'adi-adi'

" L E H O T D I A N A K " sastra Lampung, ADI-ADI.

oleh Semacca Andanant pada 08 Oktober 2010 jam 1:30

"LEHOT DI ANAK"

Semacca Andanant


Dang miwang niku anak
Bapakmu lagi tandang
Nyepok belanja pak cutik
Pakaymu meli hinjang


Jak lunik hinjang abik
Balak hinjang serilang
Niku dang hati sebik
Kipak hurikmu malang


Geluk balakdo anak
Nyin naklukko duniya
Hurik nayah geniyak
Dang niku kalah mena


Balak ta niku anak
Bibaskondo negerimu
Dang bangsamu keinjak
Hurik dibah halinu


Angok-angokko hurik
Dang nemah dibagiyan
Pak banda candung kawik
Kekalaw kedoloran


Dang tepik di say betik
Dang mundur di say benor
Tagan hurik musakik
Imanmu dang ki gugur


Ajo hiliyan susu
Wayni mah sangun suci
Rah dagingku ya niku
Kahut andanni hati


Surega wat di emak
Duniya wat di bapak
Dang niku salah hungak
Hunjakni salah injak


Ki niku radu gagah
Dang lupa emak bapak
Awas sumpah serapah
Tulah awas dang nerak


Kantu ajo lohotku
Dang niku lupa niyat
Betik betik lakunmu
nyin hurikmu nyelamat


Du'aku kendo radu
Kalaw munyay murawan
Api juga sugihmu
Kekalaw kedoloran



Emas intonku ya niku
Tangga tungguni hurik
Kurilako nyawamu
Ki tumban di say betik....


Negeri semaka 08 10 2010

"LAYIN MAK SAYANG" puisi modern lampung

# LAYIN MAK SAYANG # puisi modern lampung

oleh Semacca Andanant pada 22 Februari 2011 jam 18:25

"LAYIN MAK SAYANG"

/1/
Kahut...?
Layin mak sayang di niku, lijung ngepikko tanoh lampung
Nyak singut, ulih kuk nanom tiyung radu mak mingan lagi
Dipa tanoh say mupenahko
Say kubanggako,
senimbang jak tuyuk gerinung
Radu mak lagi gena,
bella muhinik seganggam segaga jama keduwa.

/2/
Tagan kupenok anjak jawoh
Luwoh muhili niyak rawang ditanoh
Sikinduwa tikacay cambur dihiwangni way
Tihanyuk-tirelok tibebok laju mandok 
Sakik
Sakik bagini badan,
ngunyukko culuk dilambanni tenggalan

/3/
Payu
Mak luput jak angonku
Niku pagun ku andan najin ram bida badan
Hengasmu-hengasku setimbal-setawitan
Kipak humara ram ruwa sumang jengan
Mak dapok ku lingui, niku andanan hati

/4/
Penah nyak mulang kipak mak bupedatong
Sambukdo nyak najin pudakmu linguk
Rilakon cukut tikeluk sujut di niku kahut
Hengas ku lepas di repong pulan kebas
Ngumbanko badan hinok dilom timbunan
Tanoh lampung di bumimu say agung...

Negeri semaka 22 02 2011

BURUNG PUNGGUK sastra lampung 'hahiwang'

BURUNG PUNGGUK

Hahiwang Semacca Andanant

Merindu padang ratu, ganta sarah duriyan, mula ku rindu diku, mani ram jak burasan, niku mawat setuju, mani nyak jamma pulan, hurikku mawat nantu, jak ipa keasalan, jamma sakik ki haku, mulang mak ngedok lamban, wat lamban lamban kubu, cecok ditengah pulan, tihang batang tebiyu, hatokni bulung runtan, sesay bulungni paku, resi bulungni bamban, pedom mawat bupiyu, tangih haga busulan, mejong ngedaguk alu, ngehaba tenemuwan, mati sakikdo haku, malang nimpa dibadan, liyom nyak dihalinu, cak rejiga bagiyan, gegoh pungguk ngerindu, bukundang jama bulan, najin mak mungkin temu, sejar jadi anggopan, ya mula repa haku, rasan sereta kician, kipak mak patut hamu, nyak ngilu pertimbangan.

Bara mangkung teliyu, way lunik dilom pulan, kumbang debi melayu, kambas kudan kanginan, reno kinjuk diriku, jama niku indayan, busumbah nyak di niku, najin pak gugur iman, durumi paydo haku, gering sasar tenggalan, kipak mak patut hamu, jadiko nyak kayunan, di niku say goh ratu, wat dayang kiri kanan, mit dipa juga niku, santorni kawal tiyan, temon mulya dirimu, sebatin tutukan tan, kapan niku teliyu, tan nyumbah ngeni salam, inumanmu way susu, santor ngedok kanian, api cinta hagamu, tinggal cawa di tiyan, liwan bangik dirimu, sekula tinggi nihan, nuntut segala ilmu, balak di sekulaan, sumang anjak diriku, ya hina bugu nihan, balak mawat builmu, hurik santor upahan, duniyaku mak nantu, ki mak niku kasihan, jamma sakik ki haku, balak taru dipulan, mawat butangga tunggu, wat risokku mak mengan, nyumbah nyak jama niku, jadiko nyak kayunan, sangun mak patut haku, pungguk ngerindu bulan, kipak temu dijudu, mak ngedok kelajuwan, ibarat kinjuk batu, pubanjar jama inton, kantu malu bangsamu, ki nyak juragan lamban.

Mati hina diriku, jama niku indayan, mak ngedok liyom malu, nyawakon kilu andan, di niku say goh ratu, wat dayang kiri kanan, sumang anjak diriku, huwok ganggang umbanan, rumasa nyak di niku, pungguk ngerindu bulan, sangun mak patut haku, kinjuk nyak jamma pulan, pengatudo di niku, dang pay nyak diputagan, hana-hanani niku, say dapok ngandan badan, geringku angkah niku, say barih mawat mingan, kumbang debi nyak diku, sina jadi sekiman, lapah nongkokko siku, bulayar dilawutan, ku sambanko di niku, nyawa sereta badan, ya alloh juga haku, mati puwasmu badan, bukundang di halinu, pungguk ngerindu bulan, kayu lunik diriku, nyetik tuwoh di pulan, mak patut tihahumbu, jukuk layin tanoman.

Tabik.

Negeri semaka, 07 agustus 2011

LELAKUN ANAK TUHA sastra lampung 'bandung'

LELAKUN ANAK TUHA

Bandung Semacca Andanant 

Bismillah mula kala, kalam mula budiri, tabik pay sikinduwa, di neram keunyinni, say tuha rik say ngura, bebay dalih bakasni, jo haga bubincara, tiliyak rik tidengi, lakuni anak tuha, haguk ina bapakni, titaway ya mak haga, tiwada ya mak kasi, sering layin sekira, jama hulun tuhani, lah uyang rik taydeca, mak taru tigeganci, wadaso lamon nana, alloh tuhanku robbi, mani ya anak tuha, asing hilukni kasi, meguway ya mak haga, minjakni tegi rani, mak guway burencaka, tiyan ruwa inggomanni, say bakasni tedaya, bebay ngesokko beji, nyani bakas tekena, tuwahni di puwari, nyani ram tabur bija, bakas mak bupendiri, ina bapak tikuca, mengan mak barong lagi, sejonjong~jonjong dunna, liwan kesolni hati, liyomso radu nyata, luwah nyegokkon diri, bagi neram say tuha, anak inggom sunyinni, tiusung minok duma, ram miwang dilom hati, alloh tuhan laratna, miwang bubingi-bingi, ginalah balak nana, badan lara sekali, bela sereba bela, di haga ngitungkonni, mawat  tirasa-rasa, bang kira macom sinji.

Umanat sikinduwa, di neram keunyinni, ngedengi mak cigana, tipakay mawat kasi, cawani bebay pura, sikam bebay tengbeli, netabik sikinduwa, say mawat macom sinji, ina bapak tikuca, laju minak muwari, ya bebay sejar nana, hati jahat sekali, ratong lebu kelama, kuk naguni tembidi, repa delom kakira, jamma say macom sinji, buyundo ano kodo, repa pay hani kuti, ki mak salah ya gila, mawat wat senang hati, ki tingkah macom sina, ikin tikeni hati, taway ram radu bela, kidang mak dipuhari, ninggal bapak rik ina, hara malangni diri, kuwasa radu bela, mak dapok cawa lagi, ya nyerah di say kuwasa, repa tunjukni hani, turun mawat  musaka, wat nihando balosni, hartani kisir bela, mawat say tinggal lagi, dang angkoh disay tuha, jatuhni purarepi, kuk mengan pinsan kala, mak tetop debi pagi, jak isan ya ngerasa, tubatso manjang bingi, kidang mak ngedok guna, ki radu tiliyuwi, ya nyumbah ngina-ina, nyak kilu ampun hani, balak lunikni dusa, kilu mahap sunyinni, uyangku hani dipa, nyak tubat rik bujanji.

Kantu reno cerita, kisah say macom sinji, tawok munih jak ija, jamma say bupendiri, anak tuha sekula, luwah jak nuntut ngaji, panday ya dihukumna, say kena rik say kasi, ngehaguk jama ina, bapak dalih puwari, sebangkil ya mak haga, ngelawan ya mak sekali, ya gila kahut nana, jama ahli puwari, inggomanniso jena, nididik hati-hati, mengan nginum jejama, bebarong debi pagi, mak taru diperinsa, dilulih seunyinni, ina jak ipa hana, bapak mit dipa hani, hatini gamba nana, ki mawat diliyakni, ya alloh pawar nana, ki nungga macom sinji, kipak badan ram buya, tangi juga rasani, wat mantu betik nana, buyun nihan penghari, mawat tibida~bida, hulun tuha rik puwari, ya panday dihejongna, sipa say patut diri, rambak dusa mak haga, asing guwayni ngati.

Tabik.

Negeri semaka, 14 september 2011

SAMBOL RAMPAY TKW sastra lampung 'bandung'

SAMBOL RAMPAY TKW

Bandung Semacca Andanant

Assalamualaykum, ajo pay permulaan, tabikdo ya ajo pun, di neram keunyinni, say tuha rik say ngura, bebay dalih bakasni, jo haga bubincara, tiliyak rik tidengi, ajoso kisah nyata, nayah say ngelakukoni, bebay lapah usaha, TKW ya gelarni, induh ya radu janda, astawa lagi muli, wat munih bebay ngura, mak ngedok ki say upi, tiyan lapah usaha, lapah nyuwikon diri, ngepikko hulun tuha, anak kajong kahutni, rila tan pisah jengan, asal dang pisah hati, kenyin wat kelajuwan, say tepik lom negeri.

Ki ngitungko dibadan, bacak dilom negeri, ram dapok seanjawan, sebabangan dihati, kipak sakik bitiyan, tenemuwanni diri, pagun ram bangik mengan, kipak wat say ngemarahi, kidang ajo bagiyan, lelakun lambung bumi, lapah nyepok harungan, habang mit dija dudi, nyepok sungi upahan, ngebeduwako diri, di tiyan say majikan, pun Batin Juragan diri, ki kena say murawan, sungi nyuwiko diri, ram diandanko nihan, diangkon goh puwari, segala kepatutan, selalu dipuhari, mak ngedok kekurangan, hukum tegak budiri, ki kena say mak rawan, sungi nyuwiko diri, ki ram wat kesalahan, ram lansung ditangani, badan mansa siksaan, tisanik setengah mati, sampay badan memoran, tekapar laju mati.

Wat munih lakun badan, say nutukko napsuni, majikan say mak buiman, medomi beduwani, layin ki minsan-minsan, kantu induh risokni, ujungni ruwa badan, sakik hinamu diri, batuy kejung bitiyan, ki kak ya radu rudi, malang nasipmu badan, hurik di luwah negeri, mawat ngedok say ngandan, ngepuhariko diri, hani tiyan 'pahlawan', kidang mak tipuhari, kantu anodo kisah, mahap jama dikuti, kantubang ano salah, mak bukena dihati, tabik-tabikdo sumbah, kilu ampundo diri, ram bukilu di Alloh, kalaw munyay sunyinni.

Tabik 

negeri semaka 19 04 2011

SANAK HARUK sastra lampung'hahiwang'

SANAK HARUK

Hahiwang Semacca Andanant

Ku karang kumbang gedang, betik kidang mupahik, jak lunik ya ku sandang, togok balak mak tepik, nyak jadi jarma malang, haruk kanjak melunik, emak bapak radu mulang, nyak tepik liwan sakik, mak ngedok say ngebabang, sekelik nyak mak ngemik, hurikku pukakibang, goh jukung rakik lunik, ratong gelumbang nyadang, baday mawat ketampik, tehampas nyak di karang, hengasku tinggal cutik, ya alloh mati malang , hurikku liwan sakik, gegoh jukuk kiyambang, mak nantu di pok tepik, kipak nyak nyinta mulang, mulang dipa nyak kantik, mawat ngedok say sayang, najin puwari ramik, kipak ngedok keminan, kemaman puwari ramik, tiyan mawat kasihan, jama nyak haruk lunik, ulih penganggop tiyan, hurikku injuk nyenyik, benalu hani tiyan, hurik numpang say bangik, ya mula hani tiyan, ikin niku muredik, teladung mak uyunan, nambah perituk hurik, disan nyak mak ketahan, miwang nyak dihati lunik, mati malang mu badan, tuwoh haruk jak lunik.

Nyak miwang selesokan, batuyku liwan sakik, ulih mawat ketahan, penyawa mapu sakik, tandakdo niku nakan, ikin niku muredik, sepok kekar tenggalan, ki haga makay nganik, lapah injuk bambangan, ngebatok hiwang sakik, mawat ngedok tujuwan, dipa harungan hurik, tenayku kebetohan, mak ngedok say ku kanik, badanku panas ngison, meruyuh  panas kulik, disan lupa ingoan, mak ngeranyaman lagi, nyak tekapar tenggalan, pedom injuk hanipi, disan nyak tungga di emak, miwang nyak dipangkuni, mati sakik nyak bapak, tepik  di lambung bumi, tulung nyak kidah emak, tagan nyak nutuk kuti, sakikga nyak diliyak, hurikku purarepi, mak ngedok rangku numpak, sungi ngindomko diri, sunyinni tiyan nulak, kapan kak ku ratongi.

Ya allohu emak bapak, alloh tuhanku robbi, ki dapok ku putulak, ajo bagiyan diri, repa nyak haga minjak, mak ngedok rang budiri, bulayar jukung gerak, bulan tanggal sehari, ngunyukkon culuk ruwa, parik sebidang lamban, ngilu pedih rik iba, kantu wat say kasihan, di diriku say papa, sanak haruk keumban, kantu wat tan say rila, ngeni mengan pak pinsan, radu sukurdo riya, ki wat hulun kasihan, nyak disani beduwa, dijadiko kayunan, kipak mak injuk jarma, jadi budakni tiyan, pagun juga nyak rila, halok radu bagiyan, halok radu bagiyan, hurikku di duniya, layin sandang-sandangan, haga bugaga dipa, balakdo kidah badan, kidang mawat budaya, terok haga bulamban, kuk rasan induh dipa, kantu ano bagiyan, lelakun di duniya, nyak sanak haruk tumban, depikkon hulun tuha, tikacay jak babangan, tuwoh ditengah rimba, mawat ngedok say ngandan, haruk ketutuk papa, nabik-tabikdo nihan, di tiyan say muliya, kantu mak sekenaan, kilu mahap paydo ya, cambay mak bujunjungan, tuwoh di tengah rimba, huwok sisa tapiyan, tumban mawat tihaba, reno kisahni badan, wassalam antak ija, ano ya kilu andan, di kuti say muliya, dang munih jadi haban, tibidi injuk maksa, ano kadar harapan, di neram sapa juga.

tabik.

Negeri Semaka, 25 september 2011

MIDANG sastra lampung'bandung'

MIDANG
Bandung Semacca Andanant

Assalamualaykum, salam sikam jak midang, tabik ajo diya pun, kantubang salah karang, ajo wayak tisani, say ngisahko di midang, hinji kisahni diri, midang di tanoh seberang, riya luhku tehili, selesokan nyak miwang, haga ngumbanko diri, lebon jak pemekonan, tumban jak ahli wari, lucuk mak bupegungan, hulun tuha puwari, jawoh anjak tontongan, lapah mit dija dudi, haga nyepok guwayan, mit di say tilulihi, mangkung ngedok lowongan, malih munih mit dudi, reno munih timbalan, bela munih serani, bulan tahun bulimban, mak juga mansa gawi, numpakso kebeniyan, numpang jama puwari, risok nyuwiko badan, santor  mengan mi ngingi, tirahni tiyan mengan, laju jak duway mandi, terus rambak pepohan.

Mansa munihdo gawi, gajiyanni raniyan, cukup pakay meli mi, tutuk bayar konterakan, kapan lapah bugawi, wat risokku mak mengan, ikah nginum way temati, suwani  geguringan, radu nahun ki nandi, midang di tanoh seberang, haga ngajong mak bani, rabay kantu mak senang, tekekoh umurku ji, tambah tahun bubilang, liyom nyak jama diri, wat sugih mak kesulang, haga mulang mak bani, liyom jama di tiyan, nyak midang radu beni, kidang mak kedoloran, api sugihni hati, mangkung wat kecapayan, kuk balun mak kebeli, tangih haga bulamban, kantu payudo diri, tedos sandangdo badan, kekalaw ya kak nanti, nungga wat kepawaran, kipak mak cakak haji, sejar cakak ajiyan, dua dalih bugawi, kalaw wat perubahan.

Tabik.
Negeri semaka 10 08 2010

TRANSMIGRASI sastra lampung 'bandung'

TRANSMIGRASI
Bandung Semacca Andanant

Assalamu alaykum, ajo pay permulaan, tabik ajo diya pun, jo haga bubincara, lampung negeri say agung, tanoh emas ya adokna, ngebun hasilni ngagung, tanoman humbi nana, hulunni betik-betik, bupiil pesenggiri, sapa ratong muredik, dianggopni puwari, ya ngicik betik-betik, angkon nihan dihati, ki wat say numpang hurik, mak sungkan ya ngagihi, sina halok lantaran, watni transmigrasi, lampung jadi pilihan, say patut tiratongi, alamni helaw nihan, api lagi jarmani, mulekon rik muanan, mak ngungkung sapa puwari.

Say ratong ngaban-kaban, jutaan ki bilangni, pemerintah bualasan, mak dapok ya ngatasi, tiyan ratong tenggalan, padahal mak sekali, halok senangun nagan, nyimbinko anak negeri, pemerintah budalih, pemerataan penduduk, ya mula sagih-agih, di jawa padok numpuk, asing ulah rik sugih, dudi so radu rituk, ya mula tiyan malih, mit lampung lapah nyusuk, pemerintah budalih, pemerataan penduduk, di jawa radu lebih, kelamonan penduduk, acak daerah barih, mawat turuk perituk, babahni sagih-agih, acak di lampung padok numpuk.

Tanno ampay kesiwan, di neram anak negeri, susahni kehuri-an, budarak mak mingan lagi, tanoh bela seganggam, jama tiyan jak udi, ram nyimbin dipinggiran, miwang ngeguguk jari, ram lampung bangik nagan, lagi kala sekeji, mak ngedok penulaan, bacak angkon rik puwari, mak mikirko harungan, anak umpuni nanti, repado kehuri-an, dijaman tiyan nanti, ganta ampay kesiwan, di neram keunyinni, malang nihan bagiyan, hurik ram mak dipuhari, ram ngemis dilamban tenggalan, hulun mak ngedok teduh, ram kalah dihitungan, hunjakni ki peneduh, kantu payu puwari, dang lamon semok teduh, kekalaw kak say duri, ram dapok bupeneduh, mak lagi kena budi, hunjakni jadi yeyuh, hurik ram jadi bureti, ki hulun ngedok teduh

....Kantu payu tuwah kekalaw kak say duri..., say radu ano radu deikin tipusalah rik tipusanggah...

Negeri semaka 17 10 2010

LIJUNG SINGUT sastra lampung 'bandung'

LIJUNG SINGUT

Bandung Semacca Andanant

Asalamualaykum, sijo pay permulaan, tabik ajo diya pun, jo haga bubincara, nasipni hulun lampung, ganta jo injuk repa, mak lagi ki di gunung, hunjakni ki di humara ,ibarat kinjuk burung, habang mit dudi dija, nyepok isini lungkung, pakay penyambung nyawa, ulih di tanoh lampung, radu mak lagi gena, nayah hulun ngegimpung, ratong jak ipa ipa, tinggal neram say lampung, tisimbin mak budaya, jadi mayuhan hulun, ulih mawat buguna, kipak wat lading candung, sudi mawat buguna, kudul nyimpon di sarung, tuha mawat bubisa 

Berakni tanoh lampung, lagi di tumbay saka, asing ulah rik harung, lagi mudah tirika, kupi ladani ngagung, cangkih parini juga, sina tanda ram lampung, jaya di repong tuha, gantaso mawat lagi, mak gegoh kala saka, tanohni mawat lagi, radu bela segaga, jama tiyan jak udi, kiriman tuha raja, hani tiyan puwari, ratongni anjak jawa, api cinta kehaga, sunyinni radu kari, ya tiandan gegoh raja, tibujuk rik tisuwi, tibangunkon ranglaya, gedung tingkat budiri, sarana api juga, sunyinni radu kari, tanohso berak nana, hektaran ki bilangni, mansani cuma cuma, jengan tiyan butani, tiyuh tan wat sekula, rumah sakit budiri, pasarni reno juga, pusatni ekonomi, gedung seni budaya, wat munih sekula tinggi, sudi dipado pokna, nyak butanya di kuti, layin di pekon tuha, kantu di teransmigrasi, tiyuhni hulun jawa, say santor dipuhari

Tinggal ram say bubiti, miwang mak buway mata, mejong ngeguguk jari, bela dipuhaba-haba, pekon tuhaso mati, mak ubah goh umbulan, liwan hiyon angini, mak ngedok pembangunan, liwan sakik ki nandi, lijung ngepikko lamban, ulih delom negeri, ram hurik mak tiandan, mak ubah anak tiri, tiandan kapan mingan, mak ngedok suwa suwi, hunjakni penghariyan, kantu rena puwari, nyak lijung sambil miwang, singut jama puwari, ku batok tandang midang, kalaw kak di anak nanti, wat nungga masa terang, dang lupa sekula ngaji, pakay neram bujuwang... 

...PAYU TUWAH TERIMA API BAGI.... 

Negeri semaka 17 juli 2010

"MENCARI TAKDIR"sajak sang pengembara

"MENCARI TAKDIR"sajak sang pengembara

oleh Semacca Andanant pada 09 Oktober 2010 jam 21:54

"MENCARI TAKDIR"

Gulita menyelimuti pagi
Arak-arakan awan pun bertandang di negeri sejuta mimpi
Membawa gumpalan berkah dan berjuta-juta nikmah
Hujan pun turun menyegarkan fikiran yang mulai usang


Pagi itu benar-benar enggan terbangun
Lelap dengan mimpi berbuih jejuta harapan
Sebuah asa terengkuh tak bertepi menghampiri
Canda merayu menghibur malam-malam yang sunyi


Hidup adalah kehendak takdir
Hidup adalah menjalankan takdir
KehendakNya diatas segalanya
TakdirNya ada dimana-mana


Asa tak boleh pupus oleh takdir
Dibalik takdir tersimpan berjuta-juta harapan
Disini takdir enggan untuk menghampiri
Di ufuk sana ada pelangi yang menanti


Usahlah lelah melangkah untuk hijrah
Mencari takdir yang bersemi diantara celah-celah
Terangkai indah diantara bebatuan dan pepasir
Sebongkah takdir yang terbalut misteri



Negeri semaka 09 10 2010