KABAR DI JABUNG
Hahiwang Semacca Andanant
Riyah riyuh di punjung, beruga mayin peci, api kabar di jabung, kalaw munyaydo kuti, kabar dibatok burung, ratong di sikam lawi, hani tiyan di jabung, semapu geniyakni, mak jawoh jak pucukni bung, nayah ruwi kesihni, sanak ngura di jabung, semapu di lakunni, say nyani alam ginjung, togok dasorni bumi, hani tiyan di jabung, wat tiyuh begal hani, disando bumi lampung, cadang sanga negeri, ratong pelisi ngegimpung, kiriman mabes polri, goh masu kijang gunung, tiyan nyepok mupuhi, dipado sanak jabung, say kuruk target hani, goh masu kijang gunung, cara mak milih lagi, tipinja kuruk gahung, ki mawat timbak mati, say mati mak kehitung, induh pira bilangni, lebon hengas rik balung, dipado pok kuburni, say nyaniko ram bingung, dipado martabatni, babah hukum tijunjung, kidang dipa adilni, sanak ngura di jabung, nayah temon say mati, wat hukum di ujung candung, wat munih di pelisi, say nyanik sakik jantung, ki hukum mak budiri, salah mak pira hitung, hukum rimba terjadi, goh manggang merun jagung, manusiya perummanni, lucuk hengas lom lalung, alloh lawi pedihni, sanak ngura di jabung, tibunuh karakterni, hunjak ki hulun lampung, cadangdo lom piilni, gelar wawayni lampung, hancur mak ubah heni, ginyur injuk gelepung, mak nihan ngedok reti, kak hulun ngenah lampung, mak ngedok teduh lagi, disan sakikni langsung, injuk layin di bumi.
Balin pay say tiumung, dilom hahiwang sinji, lapah manjaw di jabung, kenyin panday tuwonni, ki hanggan kabar burung, kantu sumang tegosni, mak temon kindo buhung, celaka ram jadini, ulih kuk nanom tiyung, radu mak mingan lagi, tanoh gelik tijagung, layin tiyan kedawni, tanoh jak tuyuk gerinung, radu gelik mak lagi, nayah hulun ngegimpung, semapudo anjakni, nayahdo lamban gedung, cecok tegak budiri, lawangkurini agung, liwan sikop mandangni, ku sepok cawa lampung, kantu wat dilomanni, kicik mulang di umung, ora ono isini, ya alloh niku jabung, liwan malang bagini, layin say si mu tanggung, geniyak nimpa diri, sakik hurik di jabung, susah haga nyepok mi, segala sugih harung, susah nyepok selahni, cadangdo nuwa panggung, juraganni mak lagi, sanak ngura di jabung, tumban lom generasi, narkoba ratong nyegung, sekula mawat lagi, si bebay tuyun lijung, ramah jadi TKI, hiyondo niku jabung, ki haga macom sinji, miwang tuyuk gerinung, sedih nontong umpuni, tinggal tiyan say agung, jaya lom kuwasani, tepik tinggal di jabung, jadi penguwasa negeri.
Repado buyung lampung, nyak ngulih pay di kuti, patutni ram say tudung, setawitan di jari, ki dapok kilu tulung, tarudo antak hinji, lakun say mak buhelong, say nyaniko ram rugi, dang neram tekas megung, seangkonan muwari, sunyin ram hulun lampung, say wat di lambung bumi, dang ngenah jelma jabung, injuk hamani pari, say isaw rik say kandung, ram lahir lom pesagi, tawit wari ram tulung, najin cutik perduli, betik jahalni jabung, hulun lampung kedawni, payu cabukkon candung, tuntut ilmu say tinggi, dang milih nyepok harung, dipa juga menjadi, ki musti injuk burung, habang mit dija dudi, mintardo dang ki urung, kalaw bungah kak nanti, ki sugih dalih harung, radu nungga kiwahni, dang lupa jama lampung, silaw kipak mak beni, ki dapok moloh pegung, kayu hara budiri, simbul-simbul say agung, tanda-jatini diri, basa lampung dang tipung, adat tetop lestari, sina tanda ram lampung, wat piil pesenggiri, mula ram kelom harung, ram ngacaykon jati diri, hulun kuwasa di panggung, ram jadi penuntunni.
Tabik.
Jakarta, 06 okt 2018
Tidak ada komentar:
Posting Komentar