KABAR DI INDAY
Bandung Semacca Andanant
Tabik pay jama inday, kilu mahap pay haku, kantubang salah guway, mak bukena di niku, ajo cawa ku rangkay, SMS nuju niku, kantu ya radu sampay, mahapkon ki ngeganggu, api kabarmu inday, munyayan kodo haku, nyak nanya api guway, ki midor api sangu, mula nyak mirak panday, ulih angkonku diku, ki dija lagi teray, ketutuk pecekelik haku, dija musim peneray, kuk mepoh mak menyangu, kaway burak tireday, rupani mawat nantu, gegoh kera bujuntay, bugayut dipenduyu, kebeniyan tipakay, sesabi hiting bayu, kapan musim peneray, rawang sereman hulu, gunung tejuh nutuk way, rubuh sunyinni kayu, sabah kelebonan lampay, tihanyuk kipak batu, relok sunyin dilom way, segala tangga tunggu.
Lamban lunik nutuk way, tihanyuk tangga tunggu, manuk lebon kelabay, induh sungi pok taru, sakikku naray-taray, mak bandingan di niku, pekon sikuk pinggir way, nayah nihan tenemu, reno kabarku inday, ku kirimkon di niku, kantubang radu sampay, tulung baca agimu, ki wat uhangni guway, ketutuk ngemik waktu, tulung balos pay inday, repa paydo kabarmu, ulih ki sikam inday, bukilu mak tetaru, kalawdo niku munyay, kiwah dilom tenemu, gandang di segala guway, hurikmu tambah maju, muhili ya kinjuk way, murahdo rejekimu, kalaw hatimu inday, lapang mak rupik haku, imanmu mak tikacay, kipak kiwah hurikmu, ulih nayah ram panday, tiyan say radu maju, lupa di sikam inday, radu mak lagi ngaku.
Radu lupa di inday, sekelik mak tiaku, gegoh way diujung tanggay, reno pay anggopanmu, di sikam sunyin inday, puwari sekelikmu, sikam tumban tikacay, niku lupa asalmu, tangih haga ngebabay, sikam say mawat mampu, kuk kabarmu gila inday, mawat ngedok halinu, induh ki niku inday, liyom jama kantikmu, ki tiyan jadi panday, jak ipa asal mulamu, ki haku gila inday, mak nyalahan di niku, kipak sunyinni panday, jak ipa keasalanmu, mustini gila inday, wat bangga dihatimu, pak sakik naray-taray, tiyuh asal mulamu, kantu payudo inday, jejama ram bukilu, dang sampay ya tikacay, pegung angkon selalu, dang lupa sekeniyan panday, betik jahal kabarmu, sina tanda ram inday, muwari sekelik haku.
Tabik.
Jakarta, 18/01/2015
Tidak ada komentar:
Posting Komentar