MUSIBAH JADI TONGGAK SEJARAH

MUSIBAH JADI TONGGAK SEJARAH

 Semacca Andanant

Sapa say mak panday jama laguni mamak Arifin M “BANJIR LAMPUNG SELATAN” say ngelendaris sudi. Tepatni rani minggu tanggal 8 juni 1986, penulisni di waktu hino lagi sanak bajang, radu terjadi banjir ataw rawang balak didaerah lampung selatan say tano ngeliputi daerah tanggamus, pringsewu, pesawaran rik lampung selatan ganta. Sunyin batanghari ataw way diatar sinji marah rik ngamuk. Gunung-gunung tejuh, kayu rungkak, sabah diterak  malah lamban-lamban tehanyut tutuk segala harta banda. Manusiya say binasa nayah nihan. Lamon say busuk dilambur heni radu jadi mayit, wat munih say binasa katan, patoh tulan ulih nyelamatkon diri. Wat say kelebonan anak, wat munih say kelebonan emak rik bapak. Sunyin diruka siya nyirang injuk haga kiyamat.

Tahun 1980an ataw tepatni 1986 yadoda tahun puncak ataw “klimakni” perogram transmigrasi [baca jawanisasi] di provinsi lampung say nikucuhkon pemerintah orde baru dibah pimpinan presiden  pak balak soehato. Pak balak  Soeharto sekuwat tenaga nyukseskon perogram hijo. Mak tanggung-tanggung sunyinni pemimpin pepira periode diprovinsi lampung nikirimkonni jak jawa. Tilah gawoh delom kurun waktu 20 tahun pemerintah mampu mindahko pepira juta manusiya jak pulaw jawa rik bali. Ki nurut catatan penduduk lampung  di tahun 1960 ikah wat 1,5 juta jiwa induh ya say busuku lampung ataw suku say barih. Say jelas di ruka siya suku lampung lagi jadi suku mayoritas dinegerini tenggalan. Di tahun 1980 ki nurut sensus penduduk lampung jadi wat sekitar 6 juta jiwa. Dapok tibayangkon repa ramikni migran jak pulaw jawa rik bali ratong seganggam burebut ngapling-kapling tanoh di lampung. Induh ya say jadi hak ulayat [milik marga] ataw milik negara. Ulih tiyan ratong nganggop tanoh lampung yado “tanah tak bertuan”.

Kayu-kayu say tuwoh dilom pulan “perawan” di gunung-gunung, tebing miring rik tanoh dantar bela nikusi tiyan. Sehinggoni pulan di lampung jadi sulah goh hulu mak kebuwok lagi. Alam murka tuhan mak suka hujungni rawang balak nerak nyadangkon sesangayni kehurian. Say cadang tilah tiyan peribumi. Repa mak riya, kelamonan hulun lampung mangkuk di pinggir way ataw dipesisir pantay say jadi hiliyan banjir. Dipa munih selama hijo hulun lampung nimanjakon alam say kaya raya. Segala kebutuhan  dapok tecukupi jak alam. Sabah berak, ngemik huma segala rupa, hasil kebunni butahun mawat bela. Tecukupini segala kebutuhan nyaniko gaya hurik hulun lampung lebih anjak  sawdagar kaya. Sunyin nerima kari, nerima jadi rik nunjuk jari. Wal hasil hurik tan delom kelupaan. Sukur nihan banjir ratong nginngok rik nginjakko tiyan jak kelupaan dilom kehurian.

Susahnni kehurian jak kena musibah nyanikon hulun lampung burubah. Mulay jak pula pikir, gaya hurik togok dipandangan pelitik.  Ki jenani tinggal tunjuk jari, nerima jadi rik nerima kari, ki ganta mulay nyani, pakay sendiri rik ngebeduwako diri. Mak cutik jenani hulun lampung mak pernah ngebunan [palahijau] tano ya ngebunan. Reno munih kinjuk upahan nayah nihan hulun lampung say cambur jadi kuli raniyan. Jenani kak nayuh balak-balakan ki ganta dilom perhitungan. Reno juga kinjuk masalah pelitik tiyan radu cambur munih.

Daerah lampung temon-temon delom kesusahan. Sementara didaerah seberang asal transmigrasi [jawa] delom kepawaran. Pembangunanni pesat, ranglayani tibangun, pusat ekonomi wat reno munih pendidikan rik kesehatanni. Mak ketinggalan industerini. Dipa-ipa paberik cecok misalni di daerah JABODETABEK [jakarta bogor tangerang bekasi]. Diija lapangan kereja nayah nihan. Ngeliyak peluwang hijo kemama sanak pura lampung nyilir rik mak haga ketinggalan. Tiyan turuk ngakuk bagiyan. Ulih kipak di lampung haga nyepok lapangan kereja susah nihan. Haga jadi petani ataw ngebun kupi rik lada tanohni  radu mak lagi. Dijaman hijodo say jadi awal mula migrasini hulun lampung balak-balakan luwar jak tanoh lampung selayin ulahni tugas negara. Rik dijaman hinji patut juga sejarah nyatat bahwa progeram transmigrasi [jawanisai] yado kebijakan pemerintah say nayah ngelahirkon pemasalahan bagi masarakat rik daerah say jadi tujuwan transmigrasi.

Migerasini hulun lampung de pulaw jawa dapot tibagi jadi pepira turap. Bedasarkon jak masa ataw periyoda;

1.Generasi pertama [1986-1995] , angkatan nyepok pengalaman.

Generasi hijo dapok tiucakkon generasi tukang kusi ataw pembukak ranglaya. Mintar jak lamban jama sangu rik niyat nyepok pengalaman tiyan midang lapah mit tanoh jawa ataw daerah barih. Gelarni riya nyepok pengalaman, segala guway ticuba mak ngedok hatuan. Di generasi hijo mangkung ngedok pemikiran say jelas, sunyinni ngelantokan di niyat nyepok pengalaman. Angkatan  hijo munih  Layin cutik say mulang gagal ataw istilah hulun tumbay mit ngusung mulang bangkang. Kipak ya pagun tinggal di rang midang nasip tiyan cukup nyani hati ram pedih. Tiyan pagun taru dilamban ataw nuwa kontrakan. Angkatan hijo dapok tiucakkon gagal total dilom migerasni hulun lampung luwah jak bumi ruwa juray. Di jaman hijo juga gelar waway suku lampung tipetaruhkon ulih nayah say jadi pelaku keriminal ataw jadi peropokator di lom gerakan perburuhan di pabrik. Padahni bagi penyimpok kerja say asal jak daerah lampung liwan susah ngemansakonni. Dijaman hijo munih radu terjadi diskriminasi ngehaguk penyepok kerja suku lampung.

2. Generasi ke ruwa [1996-2005], angkatan nyepok kehurian.

Tambah rani tambah lamon say nyepok guway di daerah lampung. Sanak ngura say ampay lulusan sekula teladung induh say tamat ataw ya putuk sekula. Sanak kemanjo perituk dihaga guway. Kipak taru dipekon juga haga ngeraritukkon huluntuha rik puwari. Hujungni tiyan lapah migerasi munih luwah jak daerah lampung. Bukaca jak generasi pertama  say gagal, generasi say ke ruwa jo lebih siyap rik lebih buharungan. Mulay jak niyat lapah togok dipemikiran. Ulih kipak tehitung gagal retina generasi say pertama radu nyaniko lantokan rik ngebenutuk pula pikir kemama pemidang generasi say keruwa. Liyak gawoh angkatan say ke ruwa jo mak milih guway say peting halal rik dapok nambah kehurian. Ulih misi say dibatok yado nyepok kehurian. Mak salah-salah di generasi say keruwa lamon kemama pemidang jo keliyak lebih sukses jak angkatan pertama. Di generasi say ke ruwa jo rata-rata radu ngedok lamban najin pak kelas dibah. Ngedok kendaraan paling cutik ruda ruwa, wat munih ruda pak. Orientasi kerejaan layin lagi di kerejaan pabrik kantu di perdagangan, bisnis rik jasa.

3. Generasi ke telu [2006-2015], angkatan nyepok kelajuwan

Di generasi hijo tihaharap mak lagi susahga nyepok kerejaan.  Ulih api-api say radu jadi landasan jak angkatan pertama rik keruwa dapok tinggal ngelaju riya. Tumpaan tan midang radu wat minak muwari say jadi harunganni. Sumang jak generasi pertama rik keruwa unyinni ki mak ngekar tenggalan mak mengan. Di generasi say ketelu jo lebih sukses lagi jak generasi say pertama rik keruwa. Liyak gawoh kak mulang buka ataw lebaran semapu pedatong tiyan mulang mit pekon. Say nyata ruda pak radu melamon say teredat di tengahbahni lamban.

4.Generasi ke pak [2016- togok jemoh saway], angkatan nyepok kepawaran

Generasi hijo tiharapko nihan mak lagi canggung di gelanggangni hulun. Ram dapok bukiprah say sejajar jama hulun barih. Mak lagi niyat jadi kuli kantu jadi pemilik gawi. Ram dapok ngebangun sekelik rik daerah ram lebih maju lagi.

Tabik.

Jakarta, 26 desember 2014