BEREKAH ROMADHON

BEREKAH ROMADHON

Cerbun Semacca Andanant

Ampay pira rani kuruk waktu bulan puwasa  pikiranni  Andanant  radu tebinta di pekon  juga. Maklum gawoh ya radu pepira tahun mangkung aru mulang  jak midang. Sekati ya ngepikko tiyuh midang mit de kota, ya mak ubah lebon nitelon bumi. Mak ngedok kabar berita. Kipak wat kabar nyawakon hulun tuhani tiram rik meruyuh ya tetop mak ngedok kabar berita. Induh api ngebani bang ya sampay reno, induh wat suya ataw ki ya wat cita-cita say jadi tujuwanni midang de kota. Atawdo ya sakik hati jama muli say jadi kundangni.

Tahun hinji ya buniyat mulang. Rasa tiramni jama Emak radu keliwat langsung. Induh ki jama kundangni halok radu mak diangon. Kipak kekala rasa tiramni lebon ulih rabay jama bapakni, ya sungkan haga mulang. Ya ingok repa marahni bapak raskala dikayun mit de sabah nulung ya, Andanant maka haga. Ya meribok-ribok haga pak butangan. Kelakuwan hino nyaniko Andanant nyelipko  rasa sakik hati jama bapakni. Ulih radu biyasa ki sanak pekon api lagi ampay cakak meranay guwayni mak kantu memidoran gawoh. Dipa munih Andanant ketutuk anak tuha, bagini hulun lampung anak tuha segalani. Ya jadi simbul dilom sekelik.

“.... emak penah yu nyak mulang. Dang lupa gulay rik buwak kedemonanku, seruwit rik lemang pancung” cawani Andandant bebujuan jama emakni liwat henpon [handphone] say lagi ngeteren masa hinji.

“ yu nak kanah emak kariko. Say peting Andanant mulang buka hinji. Emak tiram nihan jama niku nak......”. sambil tekeluwoh emak nyambuk telpon  jak Andanant.

 

Rasa hatini emak hanjak rusak. Ulih anak kahutni say selama lebih jak lima tahun mak mulang-mulang tano radu kesiwan. Hatini emak sapa say mak cadang ki anak say luwah jak kandunganni lebon mak ngedok kabar berita. Siwa bulan ya ngandankon dilom kandungan, titambah masa sanakni togok meranay cakak kahut andanni mak kurang rik susut. Anak tetop  anak say najin kipak anak ngeciwako huluntuhan. Anoda say gelarni hulun tuha sejati.

Pepira kali emak ngebintako Andanant sambil ya menok-penok potoni, mak nirasa luwoh mehili ngebanjiri bihom mari  niyak de bumi.

“Andanant.....dipa niku anak? Emak tiram nak......” sambil culukni megung potoni Andanant.

 Emak temon-temon tiram. Tiramni  radu tilansung, ngelangkut rik ngelumut. Radu karatan kinjuk besi. Induh rerisokni ki kak pedom ya reriyangan. Ya minjak tegagaw, seulah-ulah tungga jama Andanant. Dilom sembahyang selalu nicakakko dua bukilu jama tuhan kekalawdo Andanant selalu dilom jenonganni tuhan.

Seredikni leberaran selisuhni Andanant. Ya radu mak kepenah lagi kapan waktuni mulang. Hatini musah rik gelisah injuk kena gusar. Api lagi ki nengis suwara takbiran miwang hatini Andanant ngebintako Emak rik bapak sereta adek kahutni. Ya ngerasa salah rik bedusa ulih beni midang mak mulang-mulang. Ki tahun hinji ya butikat bulat haga mulang. Ya mulang......reno keputusan hatini Andanant.

 Ya nyepok sanian pedatong pakayni emak rik adek-adekni. Bapakni juga mak ketinggalan. Raskala ya lapah-lapah ditengah pasar, ketengisan suwara jak jawoh.

“tulung...tulung....tuluuungngngng, ramut....ramut...ramut. dumpitku kena cantik”. Pekikni muli say sambil miwang nunjuk de arah bakas say tuyun  nyantik dumpitni.

Lansung riya Andanant tegar ngebedaki tukang cantik hudi. Untung ya kesaka no jak belajar silik waktu di pekon. Jama mudah ya dapok ngalahko rik ngakuk dumpit jak tukang cantik hudi.

“ajo dek dumpitmu...”. sambil ngeniko dumpitni Andanant ngenasihati muli hudi.

“ terimakasih kiyay....”. cawani muli sambil ya ngipus luwohni.

“adek haga mit de ipa?”

“haga belanja yay, nyepok oleh-oleh lebaran. Ki mingan panday, kiyay agow de kedow?” muli nawok nanya jama Andanant.

“gegoh jama adek....”

“lamun mak keberatan ram ruwa barong yu...yay? hatini muli heno pagun watir kantubang tukang cantik no ratong luwot.

“mak cigani dek.....lapah..”

Lapahdo tan ruwa nyepok sanian pedatong lebaran. Sambil lelapahan tiyan ruwa kenalan. Pepinsan kimut hanggum luwah jak pudak tiyan ruwa. Liyom-liyom mak tinyana dilom hati tiyan ruwa nyegok rasa iling aliyas gering. Hemm,,,,? Muli sikop bukaca mata jak  menggala asalni gelarni Siwaya.

Rani kisir manom. Serebok lagi matarani tesilop pedom disulanni. Bulan minjak bebarong jama bintang-bintang ngibuh ngedandan diri. Riyaw-bacaw suwara kendaraan say mecoh ditengah kota mulay tekisir mangi. Reno munih Andanant jama Siwaya, muli say ditulungni raskala ya haga nyepok pedatong lebaran. Tiyan ruwa kekisiran ilung mulang. Mak lupa Andanant ngantakko Siwaya  mulang de kontrakan ataw kosanni. Andihanni sewaktu-waktu ki kak ya  ratong manjaw mak tijajaw lagi. Kipak mak judu jadi ya sangun puwari, reno hani hati Andanant. Ulih temon susah nyepok muli say suku ditengah kota metropolitan. Ajo kebenoran wat muli jak menggala, muli lampung. Ya ingok di sekiman Ki lampung mangkung habis jawa mawat kedipa.

Di kota bida nihan  jak di tiyuh. Pemindayan muli meranay cikan gawoh mak ngedok batas. Layin ulih api-api, keadaan nihan say maksa. Dikota-kota rasa halok ganggu cikan mak ngedok. Liyak gawoh, ki di pekon meranay say haga ngewari jama muli pasti ngeliwati pira tahap. Pertama ki ya mangkung aru ngewari dipekon hino ya musti nangguh jama kepala meranay. Keruwa ki ya radu kenal samik jama mulini musti izin jama hulun tuha ataw puwarini. Ketelu tiyan ngewari di rang ruwang say mustini yado ruwang tamu. Kepak ngedok batas waktu. Layin ki jak di kota, tahapan-tahapan hino cikan mak ngedok. Angonkon gawoh muli say taru di apartemen, kontrakan/kos-kosan. Disan rangni mengan, mandi, ngibuh, pedom, disan munih pokni ngewari. Disan juga sungini ngegantungko pepohan basoh rik  nyangu, induh ya pakayan dilom ataw luwah. Temon, temon tejajah nasipni muli-muli pekon say midang rik sekula di kota jawoh jak hulun tuha. Jadi mak hiran ki ram ngedok anak muli mak panday-panday ngejaga diri cadang andahni pemindayan/pergaulan. Wat say jadi jobong temaksa, wat munih say badan ruwa mak ngemik bapak. Auzubillah minzalik.

Matarani radu cakak de tegi. Jak pepadunni siyar panas nyiyari bumi. Rasa panasni nutung nyuwah dibawak. Puwasa rani  hinji kerasa nihan ahuni. Andanant say lagi kereja ngerasa kelemohan mak budaya. Kidang ya tetop semangat, hunjakni serebok lagi haga buka puwasa barong jama Siwaya di kosanni. Ya mena sampay sedong Siwaya mak beni tigoh munih.

“astaghfirulloh...adek api haga lajuni. Tulung anakmu emak....!!!” Andanant cawa hatang tutuk tekelemoh raskala ya haga ngebukak rangok.

“wat nyow bang?” Siwaya tekanjat.

“wat berantih jak kuruk ngebukak rangok. Kuncini dicadangko, duwit rik pedatong say tibeli nambi niakukni munih. Repa lajuku dek?”. Andanant ngeni tanda haga urung ya mulang buka kanah sedong ya radu janji jama inani. Hunjakni lebaran telu rani lagi. Radu mak mungkin ya dapok nyepok duwit pakay ongkos rik ngebeli pedatong luwot. Andanant pusing tutuk bingung.

“sabar yay....ram ngakuk hikmahni. Kebenoran adek jak nelpon di tiyuh, lebaran hijo adek mak jadi mulang ulih ayahku buka di Palembang. Jadi lamun kiyay mak keberatan pedatong say tibeli nambi akuk agini kiyay. Repa munih lamun adek nutuk abang mulang? Siwaya nyuba ngebabang hatini Andanant.

“api .......???” Andanant tecengong. Ya mak nyangka rik mak percaya api say nicawako Siwaya.

“temon yay.....”

“payu kidah...” timbalni Andanant, hanjak rusak ya nerimani. Halok hinji radu takdir cawa dilom hatini.

Lebaran ruwa rani lagi. Hiruk-pikukni manusiya say haga mulang pekon radu mak kenantuwan lagi. Diipa-ipa ranglaya rawang dijamma say haga mulang mudik. Didapur-dapur kemama emak-emak, minan rik kakak lisuh nyani buwak rik nyiwapko bura pakay masak. Pepira kali Andanant nelpon de pekon mastiko bahwa ya jadi mulang. Rik munih mulangni hijo layin ya tenggalan kantu wat jamani jak kota.

“sapa kidah nak rikmu? Mantuni emak kodo?” tanya emak sambil tekeluwoh matani megung henpon. Ya wat hanjak rik wat sedihni nyambuk kabar hino.

“ayyyy.....induh emak, bangik ki tiyan nyomor”. Timbal Andanant ngehilak.

“cak reno gila? Muli jak ipa”.

“jak menggala...”

“hahhh....? jak menggala...???”

“menapi emak...???”

“mawat....”

Pikiranni emak jadi podor, repa ki.........repa ki?? Ulih sepandayni ngemantuko jamma menggala sesan/dawni mahal nihan. Ya pusing jak ipa haga duwit semisal temon haga jadi mantu. Kidang hujungni pikiran hino nilebonkon ya lebih hanjak ulih Andanant haga mulang. Ulih radu lebih jak lima tahun anak kahutni mak mulang-mulang.

Matarani serebok lagi segok dipengebuhanni. Debi hino Andanant rik Siwaya  haga mintar mulang de pekon. Tiyan ruwa senghaja mintar manom ulih nyin togok di semaka pagi rani. Hulun-hulun say haga mulang de pekon tabur repa hampulap ditengah ranglaya. Mak kehitung-hitung bilangni. Andanant jama Siwaya ngerawol dikeramian hino.

Seradu pepira jam nyirang lapahan, togokdo Andanant jama Siwaya dilambanni. Emak rik Bapak sereta sekelikni Andanant nyambuk tiyan ruwa. Andanant tegar meru miwang setogokni dilamban. Ya ngerakok sujud jama emak rik bapakni. Ya kilu mahap atas kesalahanni selama hinji. Hatini temon sedih. Emak juga miwang, sunyin say nyambuk Andanant tekehiwang hatini tiyan cadang selama Andanant lapah midang. Kidang repa juga tiyan senang jo Andanant radu mulang, mulang ngusung calonni kelabay rayoh.

Lelawa tekanjatni Andanant bangkira keratonganni tisambut hulun tuhani jama rasa hanjak rusak. Hulun tuhani ngesonko minak-muwari sereta tiyan jak kanan kiri, tiyan ngeguwayko selamatan. Jawoh jak semokni Andanant, bangkirani ramadon hinji temon-temon ngebatok berekah. Berekah bagi sekelikni. Berekah bagi ram unyinni.

Suwara takbir radu mulay kedengiyan jak lagi debi. Lantunan nadani ngegurah hati. Diipa-ipa lisuh nyambuk rani buka, buka jak puwasa say nyaniko ram moloh difitrahni. Di rani say sawal ram rumpok perda semahapan, selepasan dusa balak lunik dang tinggal.

Jakarta, 28 juli 2012/ramadan 1432h

.