HIWANG KAKUNANG
Hahiwang Semacca Andanant
Hiwang~hiwang kakunang, bitiyan rani nambi, ajo tangis ku karang, malang nimpa di diri, injuk bulung kaliyang, disebu angin debi, habang induh dipa rang, tepik ya induh sungi, mak nihan wat say gambang, watir kelawan diri, kipak lijung mak mulang, mawat say gamba hati, mak nihan rasa luwang, pari lebon sebiji, tumban say mak lom bilang, lom hitung mak bureti, mak nihan wat say sayang jama diriku hinji, goh kesih huwok ganggang, pari hapa dijami, risok nihan nyak miwang, kapan ku biti diri, luh gugur niti jimpang, batuy sepanjang rani, pedom culuk ngelanggang, ngebantalkon hanipi, kapando bulan terang, nyak nganti sabar hati.
Burung puyuh sembahyang, luhur ditegi rani, sakikku liwan malang, mak gegoh jama kuti, kuti ngelahay lalang, kapan kak nontong diri, nyak sungguk sambil miwang, alloh tuhanku robbi, lijung nyak sambil miwang, ngebatok suya hati, najin ku tunggu kandang, sakikga nyak puwari, isut~isut ngejimpang, ngepikkon ahli wari, midang niyat kebuwang, mak nyinta mulang lagi, kalawdo bulan terang, najin tanggal sehari, kipak nasipku malang, kalaw nyak sabar hati, ki ngitungko di rangrang, wat lurus wat bingkongni, wat gunung wat pumatang, wat munih say dantarni, kidang ajo tinyandang, malang nimpa di diri, induh kapan nguluran, nemah nyak di ilahi
Bebay tuha mit nyalaw, mintarni manom rani, repa haga mak layaw, bay tuha lebon sugi, ajo nyak tikejajaw, tidampar induh sungi, nyeberang pindah pulaw, putuk tali muwari, tangih ki anjaw~silaw, nanya kabar mak lagi, emi layok jadi begaraw, batu hacur goh heni, disan hati tikesaw, injuk mak ninding bumi, angangon tikelemaw, api dayaku robbi, tisetik delom rantaw, upahan jadi kuli, nyak layaw tambah layaw, mak nantu bilang rani, radu parik ku silaw, sungi henayanni emi, busepok rik kekalaw, najin bitah sang biji, kipak mak jadi danaw, tiyakni imbun pagi, sejar jadi penglilaw, penangi bolok hati, bukilu rik kekalaw, jama ilahi robbi, dang putuk dua helaw, najin mangkung bagini, tagan ku sandang layaw, togok napas buhinti, nemah nyak najin litaw, halok radu takdirni, kantu wat kabar manjaw, nyawakon nyak mak lagi, sambuk najin mak sagaw, jungaw najin tembidi.
Tabik.
Jakarta, 23 september 2017
Tidak ada komentar:
Posting Komentar