"SAP RIK SUMBUK" Wayak-wayak Semacca Andanant

"KELOM HATUP"

Iduh haga lajuna
Ki rani kelom tetup
Asing ulah rik hingga
Payah haga ngehatup

Kacay say gaga ruwa
Tibedak induh pupuh
Hengak hengas buhingga
Si harop lagi induh

Bela sugih rik banda
Ngebedak angin tuyun
Say tilah balung buya
Angon karom ngelambun

Bacak gula kelapa
Jak madu mangkung mupun
Lapah bela ranglaya
Relok dilom lelakun

Ki radu injuk riya
Pagoh sesol buhimpun
Gula lebon di rasa
Wayak lebon di susun

"KELABUNGAN"

Api guwaymu rani
Cak miwang anjak nambi
Luwohmu netay biti
Tidasor nyak andahni

Ingok kala dinana
Butudung bulung punti
Neram mulang sekula
Labung di tegi rani

Najin kaway ram basoh
Ngison mawat tirasa
Niku nyeler nyak lesoh
Hanggum ki reji juga

Haku kala dinana
Cuba tontong wanggaku
Disan nyak cawa cinta
I love you haku diku

Kantu lehotku diku
Ingok nyak dang ki lupa
Najin ram layin judu
Andan kahut ram saka

"SAP RIK SUMBUK"

Sap cadang sumbuk cadang
Tepiyuk cadang munih
Tilajukon ya cadang
Tiurungkon reno munih

Repa mak susah nimbang
Say karom rik say liyom
Repa mak angon ngambang
Nanom gering lom karom

Najin tuwoh mak iwoh
Nanom pari di heni
Tiandan mak bugawoh
Tepikkon cadang hati

Kalaw mak salah sunday
Betik tulusni hati
Ki lagi hanggan teray
Mangkung labung gelarni

Kantu payudo riya
Bupukat di bagiyan
Way tetap rasa gula
Ki betik penerimaan

"LUHUR TELIYU"

Luhur radu teliyu
Asar mangkung ketimpat
Jejama ram bukilu
Kalaw badan ram sihat

Ki ulih di geringku
Dang watir najin telat
Kipak banding seribu
Niku say di lom niyat

Ki pagun niku ragu
Di geringku say wat
Tulung belah jantungku
Gelarmu disan nyemat

Hana hanani niku
Andanan say bupukat
Nemah nyak di geringmu
Duniya wal akhirat

"LABUNG RIK TERAY"

Haku labung bang teray
Jemimpang tegi rani
Rencaka rugak ragay
Tabur mak ubah heni

Nyak sakik kupak kapay
Cikan mak lebon hati
Miwang mata mak buway
Dondong peros rasani

Pengatu kidah inday
Haguk sunyin puwari
Say pawar kidah lesay
Unyukkon pay culukni

Ki pungu mawat sampay
Sejar kipak duani
Sukur ki sangun panday
Radu nyimpon di hati

"MATARANI TESENGIH"

Matarani tesengih
Belindup balik aban
Lapah ram lapah liwih
Secancan setawitan

Ram sambuk mapu sugih
Delom rani kebiyan
Kalawdo mansa ulih
Kipak mak nyedor badan

Ki tuhan dang tilulih
Kahutni takar jaman
Mak ki ya milih agih
Kipak ram mak buiman

Say tantu dilom liwih
Ram ngemik teneroan
Hunjak helaw rik lebih
Ki hurik sekahutan

Reno juga lom liwih
Ki hurik ram buiman
Tantu agihni lebih
Bida jama di tiyan

Tabik.
Jakarta, 070217