LAPAH KIDAH sastra lampung 'bandung'

LAPAH KIDAH
Bandung Semacca Andanant

Tabik pun tabik kidah, di neram keunyinni, kalaw hurik ram kiwah, lapang gandang sunyinni, tutuk mansa berekah, anjak ilahi robbi, salawat ram butetah, nuju sekelik nabi, kalaw perda mukiwah, di umat seunyinni, tabah delom musibah, sabar delom ujini, segala kelik langkah, mak lupa diniyatni, sunyinni karena lillah, tuhan ilahi robbi, mak ngemik kelik langkah, ki layin gemirokni, mak hengas kuruk luwah, ki mangkung wat titahni, mak pampang kayu sangkah, ki mangkung wat ijinni, mak bulung gugur de bah, ki mawat dipandayi, retini kindo tilah, tuhan kedaw hurik ji, goh lakun di lom warah, beliyaw suteradarani, segala kelik langkah, kendali ya megungni, goh mubil rimot lapah, ram jadi pelakunni, ikin hak tipusanggah, terima api bagi, sina tanda ram nemah, radu takdir ilahi, kelom mejadi wewah, ki betik ditakuni, mak nungga rani dawah, ki mangkung liyu bingi.

Ya mula lapah kidah, ram tabur lambung bumi, nuju semapu arah, jak bangkok mit hanyukni, dang menah pagi dawah, minjak pedom tembidi, kantu segaga kalah, rejeki wat say ngakukni, sangun radu lom titah, rejeki wat bagini, kidang kantubang salah, ki menah manjang rani, memata mawat mundah, ki sumur mak tikali, duriyan mesak buyah, api diya retini, busepok lapah kidah, dang milih api gawi, asal dang guway salah, hulun say ngeba rugi, dang manjang pedom dawah, hayalni dija dudi, bela di repa kidah, sugih di lom hanipi, ki patut neram nyabah, ngebun kupi mak api, ki mawat dagang kidah, juwal jasa rik seni, jadi kuli mak salah, nelayan api lagi, ki dapok dang say di bah, jadi pemimpin negeri, dang menah kapan kidah, nakukon puluh jari, nasip diri burubah, kidang mawat bugawi, ibadah mawat salah, ingok tuhan gelarni, kenyin dang salah langkah, hurik di lambung bumi.

Kantu lapahdo kidah, dang tijondongi lagi, jemimpang nyepok langkah, niyat ngerubah diri, makay budi mak salah, akal kejuju api, nyanik hulun mususah, sudido say mak kasi, angok-angokdo kidah, dang nontong kanan kiri, kantubang salah langkah, tijajaw ram jadini, jemimpang kuruk rulah, celaka ram jadini, goh jukung lebon arah, kena sekandang bumi, ki radu salah langkah, karomso radu pasti, najin sesol rawang rah, mak ngedok guna lagi, ulih kantu mak mudah, ngolohkon rani nambi, najin dapok burubah, kantu layin masani, lapahdo payu kidah, tutuk hanggumni hati, nyepok hurik say kiwah, pawar gandang sunyinni, nenggarah mawat salah, nontong bintang say tinggi, sina tanda ram di bah, ngemik peretok hati, ki radu hurik bungah, dang lupa asal diri, budua dalih nyumbah, ram ngehambakon diri, kekalaw santor kiwah, pawar di segalani, mansa hurik say berekah, duniya rik akhiratni.

Tabik.
Jakarta, 301216

AHOK DELOM KEGAMBANGAN???

AHOK DELOM KEGAMBANGAN ???

Mak radu-radu rik mak panday bela-bela pebalahan ngicikko Ahok di duniya maya rik duniya nyata. Ki injuk SDA pebalahan tetang Ahok yado SDA say dapok tiperbaharuwi. Selalu wat gawoh say jadi inspirasi pebalahan induh ya tetang politik, ekonomi, agama, ras rik      ideologi negara. Ram musti panday-panday ngepikko posisi komentar (cela wada) diri neram di pok say patut rik halok. Ram dang gampang tihanyuk dipebalahan duniya maya say dapok ngantakko neram buurusan jama pihak berwajib sementara guwayanni hulun tetop laju. Dapok gawoh ram nyanik ngebangun opini ditengah-tengah masarakat asal dapok tiputanggung-jawabko.

Wat telu sekat versus say timbul agini kasus penistaan agama ulihni pak Ahok. Say pertama yado versus hantara peribumi rik (keturunan) cina. Keruwa hantara Islam rik Nasrani. Rik ketelu hantara Islam rik Muslim.

Nayah say buanggopan bahwa ki Ahok jadi gubernur DKI luwot ya bakalan ngerubah DKI gegoh negara Singapura. Jarma-jarma keturunan ngedok peluwang bisnis say lebih balak luwot jama dijukni kemudahan perijinan rik ngegusur usaha-usaha sereta jelema lunik di jakarta. Liyak gawoh pepira kali kejadiyan penggusuran jama alasan ilegal ataw mak ngemik ijin.

Reklamasi teluk jakarta. Tibangunni pepira pulaw saniyan say nimbulko pertanyaan bagi neram, haga api rik pakayni sapa? Lamon kabar berita nyawakon apartemen-apartemen say tibangun dipulaw saniyan radu tiiklanko di Tiongkok, Taiwan rik singapura. Apartemen kemano dapok nampung sekitar 1,5 juta jiwa. Hijo dapok tipastiko penduduk jakarta nambah 1,5 juta jiwa say say mak tiperasako naanni ngedok KTP jakarta. Jelema indonesia mak bakalan kebeli apartemen mewah hino, jadi radu dapok tipastiko jelema indonesia ikah dapok jadi kuli ataw beduwa.

Jawoh jak isan, ganta ramah ngegambako negara ram bukiblat di negeri Tiongkok. Mulay jak ekonomi, poltik, budaya malah kuk ideologi negara. Hulun mulay watir ki ideologi komunis mulay minjak luwot. Dipa-ipa simbol komunis mulay ngelukak ataw ngulak. Imigran jak Tiongkok radu lamon ngegimpung negara ram. Tecatat di imigrasi lebih jak 1,3 jiwa say bupaspor wisata. Induh tabur mit diipa gawoh jelema kemano.

Bagi pecinta NKRI jelas mak nerima rik ngebila ki negara ram dilom ancaman. Khususni say anti komunis pokok pertama umat islam. Jadi hijo kati ngebani menapi umat islam di aksi 411 rik 212 reno semangatni nunjukko pembelaan ngehaguk Alquran rik ngilu Ahok tibuwiko. Induh kidah.

Tabik.
Jakarta 2112

NENGAH NYAMPUR sastra lampung 'bandung'

NENGAH NYAMPUR
Bandung Semacca Andanant

Tabik pun nabik-tabik, puwari inday kanca, say jawoh rik say redik, say tuha rik say ngura, ajo wayak ku sanik, pakay neram jejama, kantu mak kena di pik, mahapkon ya ki riya, mintar jak jimpang lunik, niyat keliling duniya, campur jama say ramik, pujama inday kanca, duli diya pak nyetik, taru jama keduwa, tisesat nedos sakik, kalaw burubah siya, dipa juga rang tepik, di tiyuh ataw kota, piil dang sampay tepik, pesenggiri tijaga, sina tanda ram hurik, hulun lampung gelarna, dang malu kipak cutik, nunjukkon sapa kita, dang tepik di say betik, guway helaw tijaga, pucampur di say ramik, ngati-ati penyawa, hati dang mudah sebik, wangga waya tijaga, najin cawa tan segik, cukup simpon di dada.

Najin waktu ram rupik, dang lupa waktu lima, cecokkon najin cutik, hanggan kawa di kita, dang munih ki sebudik, nangguh mawat kuwawa, hakal budi ngelilik, rugi mulang di kita, ki radu dapok hurik, pucampur di keduwa, ingok kala ram sakik, dang mudah nepas dada, sadak gelir dang tepik, ingok di asal mula, dipa sungi sekelik, lebu dalih kelama, pucampur di say ramik, dang lupa asal kita, adat budaya dang tepik, kejuju ki bahasa, tiangkat najin cutik, sehanggan ram kuwawa, jati dirini hurik, tanda ram ngemik bangsa, anak umpu dang tepik, titaway ram bubasa, basa lampung say betik, adat budayani juga, dang mani radu tinggik, lupa di asal kita, kuk ngicik jama sekelik, makay bahasa cina.

Melamon layin cutik, say wat dihantara kita, midang lagi meredik, radu lupa bahasa, mak panday kulak gerigik, hunjakni jering ngura, kuk cawa kaluk kelik, susah ngolokko ema, anggopni radu tinggik, makay basa keduwa, sekiman iwa indik, pengrasa iwa simba, lungkung mak kodo pelik, tibatok dipa muka, budaya bahasa ram tepik, ngiwakko makni keduwa, ki haku gila kantik, lapah neram jejama, dang malu jimpang lunik, iwak junjung bahasa, najin hurik ram nyetik, pujama di keduwa, pakay andan pak cutik, budaya rik bahasa, sina tanda ram hurik, jati dirini bangsa, lampung agung say betik, patutni neram bangga, najin sekulani di Amerik, hunjakni ki di Liwa, bahasa ina dang tepik, adat sereta budaya, di layang neram kantik, maju mundurni bangsa, tanggung jawap mak cutik, jadi baban jejama, alang hinani kantik, bubangsa mak bubasa, goh iwa kalang indik, busengik mak bubisa.

Tabik.
Jakarta, 11 november 2016

GERING LAMPUNG sajak sajak Semacca Andanant

"Lijung singut"

Tagan
Nyak lijung singut
Ulih dinegeriku nyak gegoh anak pungut
Mak dipuhari tangih ki haga dipusuwi
Pekon tuhaku gegoh umbulan ditengah rimba
Jawoh jak pembangunan
Sekula induh dipa
Api lagi ki pekan
Sikam jawoh mak disan

Repa sikam haga maju
Ki sunyin ranglaya buntu
Repa sikam haga minjak
Ki sunyin mata buta tepedak

Nini puyang sikam yado peladang tangguh
Hurik matini tisamban dilom cangkih, kupi rik lada
Butahun-tahun delom turun- temurun
Naklukkon pumatang ketutuk gunung
Ganta tanohni bela segaga
Anak umpuni bugaga dipa
Sedongkon besi tuha say jadi senimbang
Radu mak ngedok bisa

“ LAYIN MAK SAYANG"

/1/
Kahut...?
Layin mak sayang di niku, lijung ngepikko tanoh lampung
Nyak singut, ulih kuk nanom tiyung radu mak mingan lagi
Dipa tanoh say mupenahko
Say kubanggako,
senimbang jak tuyuk gekhinung
radu mak lagi gena,
bella muhinik seganggam segaga jama keduwa.

/2/
Tagan kupenok anjak jawoh
Luwoh muhili niyak rawang ditanoh
Sikinduwa tikacay cambur dihiwangni way
Tihanyuk-tireloq tibeboq laju mandoq
Sakik
Sakik bagini badan,
ngunyukko culuk dilambanni tenggalan

/3/
Payu
Mak luput jak angonku
Niku pagun kuandan najin ram bida badan
Hengasmu-hengasku setimbal-setawitan
Kipak humara ram ruwa sumang jengan
Mak dapok kulingu'i, niku andanan hati

/4/
Penah nyak mulang kipak mak bupedatong
Sambukdo nyak najin pudakmu linguk
rilakon cukut tikeluk sujut diniku kahut
Hengas kulepas di repong pulan kebas
Ngumbanko badan hinok dilom timbunan
Tanoh lampung dibumimu say agung..

"LAMPUNG SAY AGUNG"

Jiwaku jiwa lampung
rah dagingku juga lampung
Pesenggiriku junjung
Jadido lampung agung

Lampung sungiku hejong
Say ngandankon diriku
Sampay mataku medom
Mak luput jak bilaku

Cabukkondo pedangmu
Tuntut ilmu say tinggi
Dang dikayak negerimu
Jadi jajahan hulun

Cabukkondo pedangmu
Tuntut ilmu say tinggi
Dang dikayak bangsamu
Jadi ajohan hulun

Lampung.....say agung

Gumah gandang negerini
Hulunni betik betik
Wewah kiwah tiyuhni
Jayado lampung agung

Gumah gandang negerini
Hulunni betik betik
ruwa juray hulunni
Sebatin rik pepadun

Lampung.....say agung

"SUWARA CECIRIK"

Bingi sinji keliwat pagoh
Hiyon nening
Angkah suwara cecirik say ngerik-kerik tesetik dirawong lunik
Nyuwarakon tenemuwan diri, sakik ngelilik-lilik

Kekalaw tuhan pagun gering puandan
Kipak cutik
Kahutni
Dapok ngebabang hati say cadang

"MENAPI"

Nyak hiran kantik?
Kala kuti tesetik, mekik buhiwang sakik
Tulung paydo, neram muwari sekelik dilom lamban republik

Api timbalku?
Payu
Neram sangun sekelik, bubagi kipak cutik dilom lamban republik

Kidang api?
Hamu pemerataan penduduk, kidang dilampung padok numpuk
Hamu pemerataan pembangunan, kidang tiyuh tuha pagun gegoh umbulan

Mari api say dapok ku putil jak tanoman transmigrasi?
Ki sunyin buwah tiyan kebuwakni
Ranglaya helaw, sekula tinggi, pusat ekonomi, budaya rik seni

Layin mak mirak nyak cakak ngakuk buwah say dunggak
Nyak mak budaya, culuk cukutku mak togok ngigaw bulan
Tamong kajongku peladang tangguh kidang mak burimba

Hinok dihantara cangkih, kupi rik lada
Tiyan kereja sambil budua
Ngelantunko wayak-wayak kelot pahik hurik dirimba, say lawangkurini tekebok mak ngedok hanggan masa

"KILU HARI"

Inday....
Kuti say radu panday
Dapok ngepikkon hurik say halok rik mulesay
Say wewah tutuk mukiwah
Say lapang tutuk mugandang

Keni sikam ranglaya kenyin dapok teliyu
Keni sikam titi kenyin dapok butetay
Keni sikam jerambah kenyin dapok lumpak jak ginalah
Keni sikam haguk kenyin dang tejajaw
Keni sikam haropan kenyin sikam ngedok harungan

Ki radu riya ram dapok setawitan
Lapah legoh mak ngeba
Bukimbang nyambuk pengharopan
Hurik hanggum dilom munyayan

Jangan Sebut Lampung!!!

Jangan Sebut Lampung!!!

Ketika kita bicara menyebut kata "lampung" maka akan banyak hal yang akan tersentuh. Karena kata "lampung" bukan saja nama dari sebuah kota [bandar lampung] tetapi lampung adalah merupakan nama dari sebuah provinsi diujung pulau sumatra, sebuah etnik dan juga budaya dan bahasa yang ada di negara republik indonesia yang tercinta ini. Secara budaya, adat, bahasa dan etnik lampung meliputi empat provinsi yaitu provinsi Lampung, Sumsel, Bengkulu dan Banten.

Ketika oknum menyebutkan suatu komunitas atau kelompok dalam mengidentisifikasi entah itu pelaku kriminal ataupun pelaku kejahatan yang disertai kata "lampung" maka banyak orang yang terluka dan tersayat hatinya. Kenapa "lampung" harus mendapat perlakuan diskriminasi? Seharusnya kita lebih bijak memperlakukan "lampung" ditengah kancah persatuan dan kesatuan indonesia. Kita bisa memakaikan nama lain dari sebuah kelompok kriminal atau kejahatan. Misalnya saja kelompok "Badik" atau nama lain yang lebih bijak. Kita masih bisa memilah-milah kata yang lebih pantas dibanding melekatkan kata "lampung".

Kriminal tidaklah identik dengan lampung. Masih banyak hal yang baik-baik tentang lampung. Coba anda pikirkan. Jadi amat sangat tidak bijak ketika kita mengatakan "lampung sarang begal" atau "lampung kampung begal". Seharusnya kita bisa berpikir jernih kenapa ada beberapa warga kita melakukan tindakan kriminal. Yang mempertaruhkan tidak hanya badan tapi juga nyawa. Ini adalah dampak kebijakan pembangunan yang tidak adil.

Ketika masyarakat lampung menerima dan mempersilahkan para migran dari pulau jawa dan bali membuka lahan pertanian untuk untuk saudara sebangsa setanah airnya maka kebijakan pembangunan pemerintah mulai mengucur. Didaerah-daerah pendatang jalan-jalan dibangun, didirikan gedung-gedung sekolah, pusat-pusat ekonomi[pasar], dan layanan kesehatan. Sementara ditempat-tempat kantong daerah pribumi tak mendapat perhatian. Selalu saja ditempat daerah-daerah pendatang yang dibangun dengan alasan daerah tertinggal.

Jadi janganlah menyalahkan atau merendahkan lampung karena ini merupakan dampak dari kebijakan pembangunan pemerintah yang tidak adil. Pemerintah terlalu diskriminatif terhadap lampung. Memandang lampung dengan sebelah mata. Seharusnya masyarakat pribumi lampung juga mendapat perhatian dalam hal pembangunan, baik pembangunan politik, ekonomi, budaya dan juga bahasa. Sehingga pembangunan dapat dinikmati diera merdeka ini. Bukan malah sebaliknya terpinggirkan dan jadi pengemis serta penonton di negerinya sendiri.

Hulun lampung adalah masyarakat pekerja keras. Nenek moyang mereka adalah peladang tangguh. Dari dahulu daerah lampung merupakan penghasil komoditas kopi, lada dan cengkeh yang amat terkenal. Amatlah tidak fair ketika kita mengidentikkan suku lampung dengan masyarakat pemalas. Hanya saja sekarang karena ketimpangan pembangunan ada dan saya tidak menampik beberapa orang menjadi pelaku kriminal. Dan itu merupakan tugas kita semua untuk mengarahkan kearah yang lebih baik.

Kita sepakat memang kriminal harus kita berantas. Dan kejahatan tidak memandang suku , agama ataupun ras. Semua bisa saja terjadi selagi ketidak adilan dan kemiskinan masih bercokol dikehidupan kita. Tapi tidak lantas membuat kita hilang rasa manusiawi dan iba dalam memberantasnya. Apalagi. memberlakukan hukum rimba dalam penanganannya. Kita yang merasa orang baik-baik mungkin lebih bejat dari mereka. Apa yang kita perbuat mungkin tidak sebanding dengan apa yang mereka lakukan. Hanya saja kita munafik dan hilang rasa iba kita ketika kita menangkap maling lalu menghajar dan membakarnya hidup-hidup. Mereka mungkin mencuri karena kelaparan atau hanya sekedar menyambung napas esok hari.

Untuk pelaku kejahatan yang divonis aparat berasal dari lampung sangatlah berlebihan dalam penanganannya. Sampai-sampai membuat tim khusus dari mabes polri untuk memburu layaknya binatang buruan ditengah hutan. Seharusnya diperlakukan secara adil melalui peradilan bukan ditembak mati yang belum tentu salah tidaknya. Sungguh ironis perlakuan sebuah negara yang menjunjung tinggi hukum bertindak tidak sesuai dengan norma-norma hukum.

Begitu juga media massa terutama televisi sangat tidak bijaksana yang selalu mendengung-dengungkan pelaku begal berasal dari lampung. Karena sekali saja mereka menyebut lampung maka berjuta-juta orang akan menyaksikannya dan merespon semua berita yang disiarkan. Untuk itu mohon kiranya pihak media massa dan kita semua untuk tidak terus-menurus memojok etnik lampung. Mulai sekarang mari kita STOP mendiskridit suku lampung dengan mengkait-kait tindak kriminal yang ada di daerah sekitar JABODETABEK.

tabik.
Semacca Andanant
25/02/15

Sajak sajak Semacca Andanant

"PAGUN NUNGGU"

Kelom hatup nyalok mata
Gerung humbak mecohkon segara
Angin nyebu ngehabangkon angon
Tebeliyus...

Ulah api pusikam nongor mak ngemik cawa
Mak ubahni lungguwan batu di bukit karang

Sikinduwa mu kayakkon mak ngemik pedih
Dihati angkah niku say wat dija dudi
Ngandan rasa waway ki puandan

Sikinduwa santor nunggu
Kipak timbalmu mangkung nantu
Tigoh alam jadi rerinaku
Sikinduwa nunggu tamatni waktu

25/05/2010

"piil diri"

ija kuti
ram sebesi
ki temon kuti ngerasa mubani
mak mikir seribu kali

ajo wat badik senimbang
pik tinggalni tuyuk gerinung
dilom piil pesenggiri
rega diri rega say mati

nemah pak lidang galah
sesarak kayin handak
mak urung tilampahi
hino piilni diri

mak guna tegak galah
kidang tontong tisondom
culuk cukut tikunci
wat hati lebon bani

lehot jak tamong kajong
dang lupa ram bupiil
balakkon pesenggiri
kenyin ram buadok balak

nengah nyampur tigawi
disan ram ngedok sungi
ngejuk ngakuk puandan
dilom sakay sambayan

18/03/2015

"burung kecici"

burung kecici sangun mak panday ngaji
kidang diangonni ya panday
hejongni dawah rik debingi
kapan ya leluncatan dipampang pampang hada
kapan ya iruh digawi say mak neda

ah....burung kecici
hurikmu mak lamon rimbik
pandong cutik teneroanmu
angkah menah pagi beka
rencakamu lapah nyenghaja
nimpat waktu duniya

19/03/2015

"buwah cabi buwah mendira"

buwah cabi buwah mendira
putungga dilom janji ngikok di say rasa

hamu hanipi kumbang pedom ram ruwa
tesirok dilom hati neram puandan rasa

luput rani ku bedak pakay hara
tihanyuk nutuk janji karom nantu ngehangga

debi rani bugayut dilom haga
sayuk bumi kumbang gugur lom haba

19/03/2015

"Gering Tembidi"

Sangun ku pandayi geringmu no tembidi
Sangun ku pandayi geringmu mak jak lom hati
Icak icak gawoh kenyin dang tuwoh nyuwoh
Niku bubabang ngandan pari lom lliyoh

Hinggamu sayang mak lagi rasa bimbang
Andanmu di nyak gegoh kimbang kiyambang
Dipa hagukku disan suwimu nunggu
Kidang nyak sesak geringmu kurang pajak

Ganta tagankon ram lidang pisah sinjang
Kayuh bidukmu sepok sungi say nantu
Tagan nyak tepik duli diya pak cadang
Nemah bagiku relok nyak pukekambang

Kalawdo niku nungga rangrang say gawang
Nitawit bintang bujimpang bulan terang
Cutik lehotku dang niku riwa gambang
Kundang sakikmu netunggu niku mulang

06/04/2015

"Bebay bebay Lampung"

mak lamon rimbik, kahut
kiluwanku dilom puandan
layin jadi puteri solo say hampang dikimbang; lemos delom penyawa
ataw bebay bebay eropa say hanggum mak bubalun
layin munih diya ki gegoh bebay timur tengah mak panjak kantu mata
ataw munih bebay bebay hindustan say pusorni keliyaan

nyak haga niku jadi dirimu tenggalan
bebay lampung sejati
say ngedok halok ganggu rik panday dimanamunu
helaw juga ya ki ngedok tangga tunggu

gagah rik bani goh uncal ngelepit tebing
say kehangguman puandanni ngelebihi rama rik shinta delom pewayangan
say mak haga pugiyah najin rawang di rah
rila naruhkon nyawa
demi rega diri rik setiya
mak mudah bagimu cawa putus asa
ataw ram pulipang, sayang

kehanggumanku diku tirangkay disulaman kayin kayin tapis
ku agungkon niku di sigor emas lekuk pitu say nayah makna
niku mak ku siya siya
niku kepelokni nyawaku
hurikku mak bureti
ki niku mak ku puhari

jakarta, 07/05/2015

"LIYOM"

Halok ki patut milih
Kantu nyak milih mati
Ulih liyom yado ubatni mati
Rega diri yado regani mati
Ulih mati lawangkurini janji
Janji hurik abadi.....

Jakarta 091215

Lijung Singut

Lijung singut
Sajak Semacca Andanant

Tagan
Nyak lijung singut
Ulih dinegeriku nyak gegoh anak pungut
Mak dipuhari tangih ki haga dipusuwi
Pekon tuhaku gegoh umbulan ditengah rimba
Jawoh jak pembangunan
Sekula induh dipa
Api lagi ki pekan
Sikam jawoh mak disan

Repa sikam haga maju
Ki sunyin ranglaya buntu
Repa sikam haga minjak
Ki sunyin mata buta tepedak

Nini puyang sikam yado peladang tangguh
Hurik matini tisamban dilom cangkih, kupi rik lada
Butahun-tahun delom turun- temurun
Naklukkon pumatang ketutuk gunung
Ganta tanohni bela segaga
Anak umpuni bugaga dipa
Sedongkon besi tuha say jadi senimbang
Radu mak ngedok bisa


jakarta, 20 juli 2013