Dang Tipupelik

Dang tipupelik
Sajak Semacca Andanant

Sangun say gelarni hurik
Sungi tepikni bangik rik sakik
Segala nandok dihahelokni tahok rik halok
Segala nyetik dihantara bangik rik sakik

Sangun say gelarni hurik
Mak luput jak rasa bangik rik sakik
Santor ngerasa kurang
Kipak hurik mulapang rik mugandang

Hurik sangun merupik
Dang munih tipupelik
Dang mudah cawa haram
Ki neram mangkung paham

Hurik sangun musakik
Dang neram hingga bangik
Manjang bukimbang senang
Kipak angon  ram cadang

Bangik rik sakik, sangun adatni hurik
Sunyin rasan mubangik, ki ram panday di pik

Jakarta, 26 juni 2013

Tagan

Tagan
Semacca Andanant

Tagan, dulido ya pak tumban
ikin diliwih lagi
kambas kudan mak bureti

Radu bayu
delom pepira rasa
pak tibuntuk mak ngedok say tiakuk

Niku bunjak
hanggum mupuh halinu
dihantara helawni bulan bara

Nyak tisesak
dituku pudedayu
luhku bela, nyak karom dilom rasa


jakarta, 28 mei 2013

Kelik

Kelik
sajak Semacca Andanant

ikin mu sepok ranglaya mak bucabang
ikin mu sepok wat rulah bujerambah
sunyin kelik yadoda perjuwangan hurik
sekati tepik, bangik sakik ngelilik

dang ram nemah percaya jama kallah
dang ram nemon hanggan di cawa temon
api-api say patut tipubanggan
payu ram tipubanggan
ram ngaji rik nguji dilom munyayan
ulih hurik yadoda kelik
sedong kelik piilni hurik
nyepok say betik


jakarta, 02 juni 2013

Guway hada

Guway Hada
sajak Semacca Andanant

hurik mawat ngelilik, dilom kesantoran
sunyin ikah hada, dilom sementara

mak ngedok say mak tepik kipak guway say bangik
dikala ram lapah ninggalkon kekahutan

mak ngedok say tibatok kipak angkah kepelok
dikala ram lapah nyumbah nyuhut, puhaguk

api say tibanggakon
api munih say tipungahkon

sunyin lebon tekas jak lom angangon
mak nyimpon

kulik handak say nyakak burak dibulup kayin handak
kulik halom say tanggom rutu nikanik cacing rik serom

dipa kesikopan dikala hino
dipa kegagahan diruka siya

ikah say tepik yado bitiyan dikala hurik
say tibatok angkah tengingok, guway halok say nyirok

jakarta, 12 juni 2013

NGEPIKKO PEKON TUHA sastera lampung 'hahiwang'

NGEPIKKO PEKON TUHA

Hahiwang Semacca Andanant

Habangdo niku burung, dang nyinta mulang lagi, suya-batuymu usung, sematkon dilom hati, pekon tuha bah gunung, dibah cukut pesagi, tuwoh mawat burumbung, tinggal bitiyan lagi, tagando nyak jo lijung, ngebatok suya hati, ngepikkon tanoh lampung, sakik nihan rasani, ulih kuk nanom tiyung, radu mak mingan lagi, tanoh gelik segimpung, jama tiyan jak udi, radu riya ki tiyung, hunjakni nanom kupi, jagung tuwoh dibasung, reno pay sekimanni, repa buwahni ngagung, ki tuwohni tembidi, bubatang mak ngebulung, ranggas diya gelarni, repado haga harung, nasipni diri sinji, hejong balak dikampung, kidang mak tipuhari, bindom taru dianjung, dibah ringgomni kupi, tuwoh ampay ngebekung, layu disiyar rani, sakikku layin tanggung, mawat ngedok bandingni, asing sugih rik harung, goh burung patoh kepi, hejong layin say sulung, anak ngura hukumni, rumasa mula lijung, ngebatok suya hati.

Kanjak tuyuk gerinung, togok diruka sinji, pekon tuha bah gunung, mak nihan tipuhari, balakdo kidah balung, kidang mawat bureti, tangih ki nungga gedung, ranglaya kubang sapi, ya mulani nyak bingung, api ngeba cak reji, nasipni buyung lampung, mawat sekula-ngaji, radu pay taru dianjung, hatok bulungni punti, pekon asuk bah gunung, ralang kuk tianjawi, nayah say kena busung, kanian mak bugisi, tenay nayah say gambung, betoh ngegigik jari, sapado say haga nulung, ki radu gegoh reji, sedih nasipmu buyung, tesimbin mak bureti, isut-isut nyak lijung, lapah ditengah bingi, semangkung pagi nyesung, nyak radu pindah sungi, bulayar cakak jukung, bulan tanggal sehari, dulido ya nyak lijung, jak haga nedos hati, tepikdo niku lampung, layin mak sayang diri, pekon tuha bah gunung, ngelimak tipuhari, kipak mak gegoh junjung, anggop kipak tengbidi, kipak mak anak kandung, dang munih anak tiri.

Tabik.

Jakarta, 13 juni 2013