RADIN CALAKcerita buntak lampung

RADIN CALAK

Cerbun Semacca Andanant

INJUK RADU mansa ilamat rik ngeliyak gelagatni layin lagi Radin Calak mutusko haga ngesonko anak umpuni. Ya haga nangguh.Ulih haban say nisandangni selama hiji mak juga tangi[munyay]. Radu bubat mit dipa-ipa, rumah sakit say helaw, tabib say hibat pagun juga habanni mak munyay.

Radin Calak yakdoda ragah say nalom niyaga, hartani dipa-dipa, duwitni teladung. Api cinta kehagani selalu kedoloran. Ya juga nalom, pintor busanggah. Sapa say mak kenal jama Radin Calak, bakas sukses, mekaya  ketutuk calak munih.

“...Mat tulung keni panday pay adikmu tan. Bapak radu mak tahan. Injukni bapak radu kena uraw”. Radin Calak cawa jama Mat Nadol, anak tuhani.

Mat Nadol nengis bapakni cawa reno langsung tekelemoh mak injuk bani rik nadolni. Pinsan hinji ya jadi tekeluk gegoh memuk.Jadi jamma purabay.

“Payu pak.......”. Mat Nadol langsung nguraw rik ngesonko puwari-puwari kandungni. Anak-anakni. Ya sadar selaku anak tuha tugas rik tanggung jawabni balak.Lapahdo Mat Nadol nunggai puwari-puwarini.

Bingi heno tesondo unyin anak umpuni Radin Calak.Sunyin tehaman, telesoh, kasihan ngeliyak bapak rik tamong kajong tan radu tedulik lemoh mak ngedok daya.

“Pak... jo sikam anak umpumu radu teson unyin. Cawako api haga umanatmu semangkung niku lapah. Sepenan niku lagi pagun cawako api kiluwanmu. Pinsan hijo ijinko sikam bubakti jama niku” Cawani Mat Nadol jama bapakni sambil ya miwang delom hatini.Ulih selama hijo api cinta kehagani selalu niwatkoni. Maklum gawoh Radin Calak ngedok disegalani.

“Umanatku di kuti anak...kantubang nyak mak lagi, tulung guwayko pay api say jadi pengiluwanku” Radin Calak cawa putuk-putuk ketutuk rerada ribol.

“Ya..api pak?”

“Pertama ki nyak ninggal kanah, tulung kayin kapanku makay beburak riya. Keruwa tutup kuburanku pakay kayu burak rik tanoh rerebuk jak bah lamban. Ketelu ki biyasani hulun jak ninggal titahlilko, ki nyak dang titahlillko....”

“Luwot pak..?”

“Radu heno gawoh”

Sunyin cengong. Tanda tanya ulih api cak Radin Calak pengiluwanni ikah hino. Tutuk munih api say dikilu mak bureti api-api.Hiran.

Di say masa ninggaldo Radin Calak. Api say jadi umanatni niguwayko anak umpuni.Lamon hulun ngelagok ulih api cak cara-cara say nipakay tan bida jak say barih.Bida jak selama hijo. Ki biyasani hulun ninggal tikuburko pakay tanoh basoh, makay peti betik, kayin kapan helaw, hijo malah sebalikni. Mak titahlilko munih. Induh.Ajaran api munih ano.

Di sungi barih wat ruwa malaykat say riboh-ribohcawa. Tiyan ruwa lagi ngekicik tugas jak tuhan.

“Kantik ram ruwa wat tugas jak tuhan. Hani jena wat manusia say mati, jadi ram ruwa haga ngelakukon proseskubur...”cawani malaykat say.

“lapahdo ram ruwa ngunutkoni....”timbalni malaykat say lagi.

Lapahdo malaykat ruwa no ngejalankon tugas jak tuhan. Tiyan ruwa lansung mit ngedi kuburan. Tiyan haga ngeguwayko proses kubur. Kidang mati tekanjatni pas kala tiyan ruwa sampay di kuburan. Ulih kuburan say timaksut mak ngedok. Sunyin kuburan, kuburan saka mak ngedok kuburan ampay. Moloh tiyan ruw ngehadap tuhan.

“say muliya...tuhanku. sikam ruwa radu jak ngejalanko tugas kidang kuburanni manusiya say mati jena mak ngedok. Unyinni kuburan saka” malaykat laporan jama tuhan.

“wat. Cuba pelegohan, penyin-penyinko”jawabni tuhan.

Lapahdo malaykat ruwa no ngunutko sungi penguburan. Kidang pagun juga mak ngehalu. Marik wat malaykat say ngedok peneduh cawa jama kantikni repa ki ram ruwa ngunutko lambanni ulih biyasani ki manusiya wat say jak mati pasti titahlilko ataw tiduai. Kidang mawat, mak pandayni di lamban say kecadangan no mak ngedok aktifitas api-api. Mak ngedok jamma teson ataw ramik-ramik ngeguwayko tahlilan. Moloh luwot tiyan ruwa mit kuburan.

 Malaykat ruwa no ngunutko kuburan. Pas radu nipenyin-penyinko wat kuburan say bida jak say barih. Kuburan hino mak ngedok tetanoman induh ya jukuk astawa kumbang. Nibungkardo kuburan hino. Kidang pagun hiran ya acak kuburan kuburan saka. Tanoh rik kayu sereta kayin kapanni radu muburak. Tambah hiran tan ruwa.

“temon calak bakas hijo....”cawani malaykat say

“ulih api...?”timbalni malaykat say lagi hiran.

“bakas hijoperhitunganni nalom. Kuk mati  radu niperhitungko repa carani mak kena proses kubur.....”

“haaa.....???”

Hujungni malaykat ruwa hino sukses ngejalanko tugas jak tuhanni. Kipak rerada biyak ulih sangkin pintorni Radin Calak. Radin Calak pagun mak mingan lepas jak proses kubur. Kidang ram tehakkik jama ya.......

Tabik.

Jakarta , 05 april 2012