SANAK TIKACAY
Hahiwang Semacca Andanant
Bismillah ya ku mulay, nabik-tabik di kuti, ajo kisah ku inday, hurik di lambung bumi, mahap pay jam inday, kantu mak kena hati, akuk piil say waway, dang sebik dilom hati, jak ipa ya ku mulay, ngebiti diri sinji, sakikku naray-taray, mak ngedok bandinganni, katan di lambung tanggay, reno pay sekimanni, pagun juga mak lesay, banding sakikni diri, kaliyang cambur di way, tihanyuk lambung bumi, luh gugur mak ku resay, sakik hiwangmu diri, kinjuk megung tikacay, reno pay sekimanni, ina-bapakku ceray, nyak tepik purarepi, tepik laju tikacay, diandanko puwari, ina-bapak mak ngesay, ibarat tabur heni, bapakku nyepok inday, ina mak sabar diri, tinggal nyak kupak-kapay, mak nantu harunganni.
Puwari layin ki say, melamon ki bilangni, goh kutu lesa pegay, tan nganggop diriku ji, mak ngemik kipak ya say, say ngangkon nyak puwari, goh minyak campur di way, reno pay sekimanni, haga nginum mak buway, haga mengan mak buemi, risok nyak sakik tenay, nahan betoh burani, badan mawat bukaway, kerik disiyar rani, gatolan musak-masay, badan kesih mak mandi, buya cukutku palay, lapah mit dija dudi, niyat lapah ngehenay, kantu wat say iba hati, jama sanak tikacay, anjak hulun tuhani, tiyan tabur mak ngesay, cadang andah senggiri, tikacah nyak ji inday, nyumang nihan jak kuti, kuti lapah sekula, ketutuk dalih ngaji, nuntut ilmu agama, bulajar piil diri, ilmu alamni juga, sangu hurik dibumi.
Mengan sehaga-haga,balun santor buganti, penganik bangik nana, rang midor dija-dudi, api cinta kehaga, selalu didurumi, emak-bapak kahut nana, hurikmu dipuhari, ya mula nyak busuya, jama kuti sunyinni, selaku hulun tuha, dang mudah sebik hati, kipak wat salah cara, dang sebangkil di hati, sepenyinan dicawa, sebabangan dihati, nyin selamat rumah tangga, hanggum jama sunyinni, anak kajong bahagiya, laju munih puwari, sekelik ram tijaga, tiandan suwi hati, dang mudah nepas dada, ngajak lipang hujungni, taru pay antak ija, mahap jama puwari, kantu mawat bukena, sumbah tabik dikuti, ajo kadar cerita, di neram keunyinni, kekalaw ya buguna, pakay ngingokko diri.
Tabik.
Semaka, 03 april 2012
