PAYU KIDAH
Bandung Semacca Andanant
Assalamualaykum, tabik pun ngalampura, jama kuti rumpok pun, kemama anak marga, lapah neram ngehimpun, ngebangun angkon rasa, akuk piil say buyun, umbanko cela-bada, di neram hulun lampung, api juga buwayna, lapah neram ngejunjung, adat sereta budaya, angkon-lekon tiusung, seanggopan di cara, dang mudah nyabuk candung, astawa nepas dada, pikir-pikir pay tulung, di kuti sanak pura, nasipni hulun lampung, di culuk kuti ngiya, jagung lupa dibasung, sekiman jamma tuha, awas kantu nerunyung, ram lupa sapa kita, adat kuwat tipegung, awas tikacay siya, ram jejama ngejunjung, lestarikon budaya, ram bangga jadi lampung, tutuk perduli siya, kenyin lampung jo agung, lapah andan jejama.
Cuba liyak pay tulung, nasip neram jejama, hurik di tanoh lampung, radu mak lagi baya, hulun ratong ngegimpung, ratong jak ipa-ipa, ram minggir mak ki urung, tesimbin mak buguna, tulung cawaku pegung, sirokkon dilom dada, lamun cawaku buhung, tabik pun sikiduwa, nayah ram hulun lampung, ngunyukko culuk ruwa, dilamban ram say agung, di bumi juray ruwa, hani tan hulun lampung, jarma malas kereja, haga nganik say bangik, kidang mawat usaha, lajuni pucecantik, ngemaling makni keduwa, busetil balun betik, gegoh artis indiya, kidang mahap pay kantik, tabik pay say mak riya, layin cawa pesengik, ngucakkon cela-wada, mak unyin jak say ramik, kelakuwan goh riya, wat munih kawa sakik, usaha api juga, say peting guway betik, tutuk halal hukumna, tiguway kipak sakik, najin keliyakni hina, bubanda candung kawik, ngusi di pulan tuha, kipak nganik handawik, terima lapang dada.
Retini kindo kantik, awas dang salah sangka, ki kuti ngopok ngicik, suku dang tipuhina, kipak wat tukang cantik, tutuk malas kereja, cutik anjak say ramik, kelakuwan goh sina , ki ram ji panday di pik, api mula bang riya, tantu mak gampang ngicik, nyawako cela bada, tiyan hurik musakik, tutuk mawat sekula, sedongkon kuti kantik, cukup segala-gala, balin pay say tikicik, tuwangka kala saka, tan ratong numpang hurik, pujama neram dija, tibagi kipak cutik, sungi tiyan usaha, tiangkon puwari sekelik, mawat tisiya-siya tiyan ratong muramik, bilangni bujuta-juta, jenani hurik tan sakik, ganta radu wat juga, anak umpuni hurik, ngedok segala-gala, si lampung lupa tepik, ketinggalan ranglaya.
Nulung kaci tesetik, sekiman jamma tuha, ya lepas ram digigik, tinggal ram say celaka, ya alloh mati sakik, ki lakun macom sina, muhina rik musakik, mati malumu bangsa, payu kidah puwari, ram ranggom jama-jama, dang kejungga dibiti, bubatuy mak buguna, kantu tanno puwari, bacak tuwon sekula, pak haga jadi tani, tanohni radu bela, ulih kala sekeji, tamong kajong dinana, mak ngangonkon umpuni, api haga usaha, ulih sangkin simahni, bubagi di keduwa, tanda tulung di puwari, pak cutik ram jejama, kantu payu puwari, ram lapah jama-jama, ngebangun negeri ram ji, suku dang tipubida, setawitan di jari, seangkonan dirasa, tabik sumbah pay diri, kantu ya mak bukena, ajo isini hati, radu saka kurasa, mak panday ngeluwahkonni, ajo nyak pugegapa, mahapdo jama kuti, dang ngakuk salah makna, tulung tuntun pay diri, kenyin ya patut siya
Tabik .
Semaka, 28 januari 2012
