DIPIKKO INA MATI
Hahiwang Semacca Andanant
Awal mula bismillah, wayak sinji budiri, ngederak pampang sangkah, gelatik turun mandi, kemaraw labung tegah, turun di tengah rani, haku bingi bang dawah, kelom mak ku ranyami, raskala kabar singgah, ngeni panday nyak lawi, ina kahutmu kidah, hani radu mak lagi, disan nyak tekelemoh, badan tegah mungingi, jak waya jadi pagoh, rilim luwoh tehili, haga ku tahan luwoh, cukup miwang lom hati, disan nyak tambah lesoh, hancur nihan rasani, meru mak ku perasa, miwang sededok di ari, ya alloh api daya, malang nasipmu diri, di sapa nyak bugaga, ki malang nimpa diri, bapak mak lagi gena, ina radu mak lagi, haruk nyak tutuk papa, puwari induh sungi, wat kodo hulun iba, jama diriku sinji, sekelik dang mu tanya, semapu di ritukni, seangok-angok henga, mak nihan hak perduli, ya alloh api daya, kilu santun nyak puwari, di kuti sapa juga, say ngemik iba hati, tilah nyak lebon maya, bambangan nyak jadini, api lajuku ina, nyak tepik purarepi.
Repa mak buginalah, ina kahut mak lagi, lapahni liwan jawoh, mintar mak moloh lagi, ya lapah liwan jawoh, mak tungga selamani, disan nyak tambah lesoh, injuk layin dibumi, sapa say ngeperiwoh, diri malangku hinji, mak lagi nyak dimarah, dibujuk rik disuwi, mak lagi nyak dimamah, dipusaw ngadi-adi, kipak tenayku betoh, ku sandang nyak sendiri, najin bulanni wewah, dija dudi bintangni, ramik hulun lom tayuh, pagun hiyon rasani, nyak tepik lebon iwoh, mak diandan ina lagi, gegoh lelayang basoh, hancur mak urung lagi, ki kak badanku lesoh, maring mak tangi-tangi, di sapa nyak ngalah-ngaduh, ki inaku mak lagi, ya alloh subhanalloh, tulung hambamu lawi, goh putit kepi patoh, jukung lebon kemudi, mak nihan tekejawoh, bayang kimutmu ina, unggal rani nyak magoh, niku santor tebinta, mak dapok balos oloh, kahut andanmu ina, pak badan gumbu di iyoh, niku mak ngedok cela, rila di lom keriloh, sabar di lom penyawa, najin badanmu payah, niku mak kelom muka, najin nayah keriloh, lakunku jama ina, mak nihan ina nyuwoh, hatimu pagun waya.
Kayin handak piyuna, pedom gincing di bumi, ya alloh niku ina, sedih nyak ngilingkonni, pitu jimpang jak ija, ram haga pisah sungi, ina dang watir gamba, tikukuhko imanni, ratong malaykat ruwa, kayunanni ilahi, nyambuk ina diija, nabik nyumbahkon diri, ki tiyan ruwa nanya, sapa tuhan rik nabi, alloh tibalmu ina, muhammad ki nabini, ki ya nanya agama, sapa warimu hani, islam timbalmu ina, muslim ki puwarini, kiblatmu haguk ipa, imanmu api hani, kakbah timbalmu ina, al quran ki imanni, kantu payudo riya, halok radu takdirni, kahutni bunjak di ya, ya mula dipanggilni, nyumbah di say kuwasa, tuhan ilahi robbi, ya kedaw segalana, jak langik togok bumi, kalaw ina bahagiya, melapang kuburanni, diandan say kuwasa, surega bagiyanni, dua sikam mak bela, kiludo di ilahi, ya dapok ngabulkonna, reno kinjuk janjini.
Tabik.
Jakarta, 30 agustus 2018
