SINDIRAN DIRI
Bandung Semacca Andanant
Bismillah mula mula, alhamdu Alloh robbi, hambamu mak budaya, nabik-tabik pay diri, niku kedaw segala, jak langik togok bumi, say panjak jama mata, togok di say halusni, niku segala raja, say batin dilom hati, tuhan mak ngemik rupa, mak ngedok di gegohni, tepik hejong di tahta, hinok dilom arasni, tunggaldo dilom satna, hurik kekal abadi, semapu di gelarna, seratusdo bilangni, siwa ngepuluh siwa, sina say tipandayi, tinggal say induh dipa, mak panday nyak di pokni, kantu lapah jejama, ram ngaji dalih nguji, ki ram lapah butanya, ratong mit dija dudi, bela masa rik banda, mak panday di jawapni, gelik di hani hana, nutuk riwayat hani, mak panday di tegosna, gelar say "tersembunyi", ki radu injuk riya, tijajaw ram jadini, gula lebon di rasa, hanipi lebon reti, punyana ram yado siya, netay jerambah besi, bangkindo kayu hara, rareting kayu mati.
Laju munih jak ija, jemimpang ngati-ati, tabik pun sikinduwa, nyak butanya di kuti, api nihan retina, hurik di lambung bumi, mula sampay ku tanya, ulih mawat ngereti, semapu di segala, rusiya hurik ram ji, mak panday ditegosna, hakikat say temonni, ulih di jaman ganta, layin jamanni nabi, sunyinni hani hana, teturutan gelarni, nuntut ilmu agama, dang milih dipa sungi, sapa juga ya dipa, asaldo ya ahlini, kipak mawat sekula, kidang ya nalom ngaji, panday di tata cara, ngecah-sucikon diri, ulih nayah ram ganta, hingga injuk ngereti, bangkindo pari hapa, helaw kidah bawakni, mak panday ditegosna, hakikat hurik ram ji, jak ipa asal mula, mulang mit dipa nanti, say najin kipak inton, cawa malim ku dengi, pagun juga ya haram, dalih najis hukumni, retini kindo pangan, balung balak ram sinji, jak ipa keasalan, luwah jak pintu api, retini bebuhungan, pengakuwan ram suci, ki mawat habis jalan, min seribu ram mandi, gelik way di lawutan, teduhku mak ki suci, ki mak panday di jalan, kapiyat nyuci diri, sekiman iwa hurang, mekecing nyak jo hani, bang tahi nandok di badan, kidang mak tipandayi, ram angkoh bangik nagan, mani ram ngaku suci, bangkindo salah jalan, di makna say benorni, repa lakuni badan, riya ingokni hati, sidik umanat disan, tabelirso yado sudi, alpatonahso disan, ki temondo ram ngereti, mula lakun tiandan, bupiil-pesenggiri.
Balin pay say tibanggan, cawa malim ku dengi, ki kak neram sembahyang, pak saratni musti, pertama suci badan, ke ruwa suci hati, ke teluni pakayan, ke pak rang budiri, mak lagi sak rik waham, radu yakin rasani, ampay sah ram sembahyang, reno kodo puwari, takbir latul irham, api retini sudi, sariat piil badan, mani balung budiri, ki kak neram sembahyang, nyumbah ilahi robbi, ya redik dipado rang, hani malim ku dengi, retini mak di kiri, kejuju ki di kanan, di hadapan mak sekali, ditundun mak keliyaan, tirupako mak kasi, diluwah sangka neram, retini kindo puwari, dipado pay say tuhan, say patut pok kak muji, delom mapu sumbahan, ki ram mawat ngereti, tilah mak togok tengan, tidaya radu musti, mawat togok lapahan, jawoh ram netay bumi, mak nungga ketegosan.
Laju pay say tibanggan, wat warah pasal nabi, wat ilmuni jak tuhan, siwa ribu bilangni, cawani tuhan disan, jama nabi sekeji, telu ribu lajarkon, di umatmu sunyinni, telu ribuni simpon, pakayanmu sendiri, telu ribu dang nihan, ki layin tuwakalni, retini kindo pangan, semapu dijalanni, dang neram mudah nemon, ki mak panday tegosni, dang silop debi hinok, ki mak pikir sendiri, payudo neram nyepok, lapah ram ngaji diri, kantu mak temon dapok, hareta tibatok mati, lungah buya ram nyepok, hulun kedaw ya nanti, ki wat hakni mak minok, lapahan puluh bingi, sudido say tisepok, ki ram panday carani, hani hulun mak dapok, makay ilmuni wali, henodo say tisepok, ki wat hulun ngajari, ya mula angok-angok, neram say panday ngaji, umpama di bah lawok, maknani di lambung bumi, ku tengis hani rompok, alam kecil ya bumi, alam besar dipa pok, ki temondo ram ngereti, padang mahsar gawang, api retini sudi, pok teson kak ram mulang, hani malim ku dengi, sahadat hani rompok, gelar tuhan rik nabi, ki sudi say tibatok, api pegungan kuti, si adam dipada pok, muhammad gila api, ki alloh say tisepok, panday pay ruwa sinji, ngaku hamba mak dapok, ngaku tuhan mak kasi, ngemaling makni rompok, api diya hukumni, angokdo mutatengok, kantu salah pengreti, ram nyemok salah tekok, di makna sebenorni, dang neram lupa ingok, hani malim ku dengi, ki cecok ram mak dapok, ram mejong juga kasi, ki turuy mawat dapok, sikir sir dilom hati, tapiko ya nyin titok, ki ya radu budiri, kenyin dang terasa rolok, makay ilmu mak kasi, lahaw lawalado dibadan, hudido say temonni.
Yaa...... hayyuun, pidda roayni, halipu hani hulun, hurik ruwa negeri, kalawdo wat say nuntun, di lom lapahan sinji, mak nawit babay tundun, togok guway mejadi, ki ya radu buhimpun, guway radu mejadi, serah tunggal lom lakun, alloh megung kendali, iyaka nakbudu, wa iyaka nastain, kilu tuntun rik ampun, jama robbil alamin, nyak harap kilu ampun, di hulu puluh jari, kantu mak patut nyusun, tapayan kurang ragi, kantubang salah susun, mak kena di lom hati, kilu tuntun rik santun, jama sunyin puwari, tabik di alim pura, kama tamak sunyinni, kantu mak kena cara, kilu mahap pay diri, ram perda sambung dua, jama ilahi robbi, kalaw munyay murawan, sekelik inday wari, nitetopkondo iman, jak hurik togok mati, ram delom kelapangan, bungah di segalani, ram perda semahapan, kilu rila jak hati, kantu wat kesalahan, lahir dalih batinni.
Tabik.
Jakarta, 17 mei 2018/ 1 ramadhan 1439 H
