API SAY MAK NGEMIK DI LAMPUNG
Semacca Andanant
Ahaayyy....judul tulisan diatas yadoda sebuwah ungkapan ragah-ragah rik sanak ngura tumbay kak lagi timpok bubalah di pepanca induh lagi waktu senggang ataw lagi ngetokkon bolok hati. Tiyan ngicik tunggak tedoh mak nantu dihatu-an. Maklum jaman ho mak nayahga kelisuhan apilagi peretok, cukup dapok mengan debi pagi gulay tangkil rik panggang iwa hak radu nyedong. Udutanni ki mawat gudang garam suluh ya ngelinting hibus ki mak bulung nipah.
"Api say mak ngedok di lampung jo? Haga ilmu kemuli wat, haga ilmu jaguk wat, haga tahan cikak tahan timbak wat. Haga ilmu penunduk wat, ilmu asihan wat, ilmu penderos wat, ilmu ubat maring juga wat. Api lagi haga usaha nyin hurik sukses, kecukupan segala peretok unyinni wat. Mak usah nyeberang lawok mit pulaw jawa, haga bura wat di semaka, haga butarak wat di pesagi, haga tikubur hurik-hurik wat di sukaw..."
Henoda pesan ataw lehotni jarma-jarma tuha tumbay ngehaguk sanak ngura say lagi nyepok "identitas rik jati diri".
Alasanna, ulih hani tiyan tumbay lagi jaman jebi, puyang-puyang ram timbay si jak lampung jama tiyan si jak jawa radu ngemik kesepakatan rik pesumpahan say ngucakko bahwa "bila hulun lampung mit di pulaw jawa nyepok serekat hurik maka api say dimansako di pulaw jawa haga bulaku rik manjur/akas di pulaw jawa gawoh. Reno munih tiyan say jak pulaw jawa nyeberang mit lampung nyepok serekat hurik, api say dimansako di lampung ikah bulaku di lampung gawoh. Sunyinni jadi tawar mak muhasin lagi bilamana ngeliwati lawok selat sunda rik gunung kerakataw. Kecuwali ilmu amalan [tauhid]".
Ki hani tiyan say tuha-tuha kesepakatan rik pesumpahan hino bulaku sekejang jaman. Jadi pikir-pikirdo kuti say lagi busugih haga nyepok serekat hurik. Haga percaya no mak haga nemon juga silahkon. Di era "globalisasi" sunyin radu tekak rik bukak tinggal neram dapok mawat nerima rik makayna.
Mana kesaktiyan puyang-puyang ram tumbay kesepakatan ataw pusumpahan hino ticinca ataw tikrarko di tengah lawok selat sunda. Konon ceritani, induh temon api mawat pulaw-pulaw say wat di selat sunda yadoda hasil jak pok tiyan cecok ataw mejong di waktu tiyan bupakat ataw himpun. Heno mula watni pulaw Kerakataw, rakata, lagundi, sebuku, sebesi rik pulaw panjang.
Kekosni, sunyin mulang di neram haga percaya api mawat delom cerita hino. Tilah ki cempala tisirang tulah mak kena di sapa kantu mulang di kita. Injuk hani sekiman, sapa say nganik lada si ya say kelalaan. Say perelu tigaris dibah, satu hukum ataw keyakinan pagun tetop bulaku [eksis] di tengah masarakat bilamana pengamal ataw pendukungna tetop ngeyakini rik ngamalkon ya. Keruwani yadoda pesan, bahwa bacak ram ngandan rik nguyunko say milikni kita jak haga ngandan rik ngebanggakon milikni keduwa.
Tabik.
Jakarta, 16 november 2017
