MATI KAK MALANG NASIP BAHASAMU INA
Semacca Andanant
Mati kak nayah jelema ngaku hulun lampung di rantaw jo, layin say ruwa kantu ratusan ribu malah dapok jadi jutaan manusiya. Kidang sayang angkah cutik say temon-temon dapok tiucakkon hulun lampung. Ulih api? Kenahan jak penyawa ataw bahasa say dipakay bubalah serani-rani dilom sekelik ataw paperda hulun lampung ki kak tungga. Gumah neram tano makay bahasa "loe gue" mak lagi ngerasa malu najin paperda jelema lampung. Maklum radu mak bupiil lagi, bahasa tanda bubangsa, bahasa penunjuk bangsa. Ulih ki ram bubalah makay bahasa semedu tantuda bangsa ram bangsa semedu, reno munih ki ram ngicik makay bahasa lampung tantudiya bangsa ram bangsa lampung. Mari ki ram makay bahasa "loe gue" apida suku bangsa neram?
"Hehe...tabik kantu nyalahan"
Induh ki alasanni, say nyata hurik diperkotaan kipak ram sepandayan paperda jarma lampung rasana kurang pede rik keren ki mak makay bahasa "loe gue". Hunjak lagi ki ram putungga sumang asal rik bida dialek hino jadi alasan utama. Tunggana munih di tengah gelanggang jelema ramik, di pusat perbelanjaan ataw mol tambah lagi mak pedena. Rasani repa, injuk di tengah pulan halok ki bubalah makay bahasa lampung.
"Ay...kidah dangkung pay ngemurak niku".
Say tambah sesak lagi ampay serani ruwa taru di rantaw radu mak panday lagi bahasa ina ram [bahasa lampung], kuk ema ram radu mak ralis lagi kak cawa, mak panday lagi nyawakon kulak gehigik [kulak gerigik] rik jehing nguha [jering ngura]. Kuk kak mengan radu makay sendok riya mak haga lagi makay sudu. Ki kak mulang di tiyuh bahasa say tipakay yado bahasa lampung cadang. Tambah lagi pakayanso injuk kuris...sett...salah injuk turis jak belanda.
"Alloh lawi..mati kak pungah".
Say mak kalah ngemurakni lagi yado tiyan say taru di pekon, lahir rik mubalak di pekon. Ditengah-tengah sekelik hulun lampung, anak say ampay lahir lagi upi suluh radu tiajari bahasa "loe gue". Alasanni macom-macom, wat mani hulun tuhani sumang suku, tiyan pegaway PNS, Sebatin, Tokoh masarakat, Tokoh adat rik alasanni kenyin mudah campur jama say ramik. Lebih-lebih ki hulun tuha tan jak sekula langgar aliyas sanak kuliyahan bahasa say tipakay yadoda bahasa "yes no".
"Hehe....layaw kidah amun goh reji".
Dang munih ki salah sangka, ki di duniya maya ataw mediya sosiyal nayah say ngajak rik nguraw ram bubalah makay bahasa lampung. Tujuwanni ngelestariko bahasa, kidang ki di kenyataan di lambanni malah makay bahasa "loe gue". Tejurak kan? Lucu munih? Kipak ya salah satu tokoh ataw budayawan penggiyat bahasa rik budaya daerah. Mahap layin munih ki nuduh kantu sapa gawoh say tesinggung yado ya say ngerasa.
"Hehe....induh kidah ki reno??"
Wat munih di mediya sosiyal rik duniya nyata kipak ya radu sepandayan paperda hulun lampung mak haga bubalah makay bahasa lampung. Titagu pakay bahasa lampung timbalni pakay bahasa "loe gue". Repa mak injuk jimo lawang ki bubalah macom reji. Alasanni nyak mak panday, halok ya kurang gaya rik keren ataw malu ki makay bahasa lampung rabay diucakkon tiyan kampungan ataw munih mak berpendidikan?
"Hehe...sangun riya kodo?"
Na payu. Ki temon ram bangga rik ngaku hulun lampung makin hak liyom-liyom bubalah makay bahasa lampung. Mak ngemik say mak nyambung ki ram radu risok intraksi delom bubalah. Induh jak abung, komering, semaka, daya, ranau, cikoneng ataw jak way handak tutuk say barihni. Tinggal neram haga api mawat ngejaga rik ngelestariko pik tinggalni tuyuk gerinung ram say mak ngedok bandingan nilayni. Dang lupa anak umpu ram tikenalko, titaway rik tiajak cawa makay bahasa lampung. Alang ki tulahanni ram sanak ngura jo ki sampay bahasa rik budaya lampung tumban nitelon jaman. Akik mangkung titok riya ram radu haga mak ngedok rega diri api lagi ki radu lebon. Ulih bahasa yado rega dirini bangsa. Bahasa juga tanda ram ngemik bangsa. Mak liyom kodo ram jama halinu, ulih halinu riya ngedok bahasa. Bahasani yado bahasa bayang-bayang.
Tabik.
Jakarta, 23 oktober 2017
