REGA DIRI LAMPUNG

REGA DIRI LAMPUNG

Pepira rani jo di media sosial suku Lampung nigalutko ulihni postingan akun say gelarni Uyung Mustofa aliyas Uyung pandeleki aliyas Suranto....aliyas....lamon nihan aliyasni.

Di postingan setatusni ya nyawoko ,"suku lampung kaci/kuyuk unyin. Repa ki suku lampung timusnahko jak lambung bumi setuju mawat".

Jelas say ngerasa suku lampung mak nerima diucakkon gegoh reno. Hijo penghinaan atas suku layin daerah gawoh. Hinji taruhni rega diri rik rega mati, radu repa hantak jaguk rik banini say gelarni Uyung Mustofa bang kuwawa ngehina rik haga ngemusnahko suku Lampung.

Semapu komentar rik tanggapanni masarakat lampung. Mulay jak tiserahko jama pihak berwajib, tibunuh, titikol, tiperun(bakar), tijadiko kurban. Wat munih tanggapanni mak iwoh aliyas mit tokdo ano mak nihan hak ngerasa tesinggung padahal ya ngedok daya rik ngedok kapasitas.

Kekala nyak kicik angon tenggalan, dipa piil pesenggirini hulun lampung. Babah dilom piil pesenggiri hulun lampung ngedok piil say gelarni "balak pesenggiri" rik "buadok balak". Dipa rasa kebangsaanni hulun lampung dilom guway hijo. Suku rik rega dirini dipuhina mak ngedok reyaksi sama sekali. Jawoh ki tibandingko jama suku barih semisal papua ataw bali. Jadi wajar gawoh ki hulun mak ngemik pengliyak, mapu tapos rik kenaya jama suku lampung. Dang hiran rik dang munih ki ngelagok.

Ngeliyak reyaksi komentar puwari~puwariku say iwoh rik perduli jama rega diri hulun lampung, say haga nikol, netok~tetok badan rik ngejadikon ya kurban ataw tumbal. Ngingokkon nyak jama teradisi neram tumbay, teradisi "iraw" rik "ngayaw" diipa manusiya tijadiko kurban ataw tumbal dilom sasembahan.

Apido patut ram ngincang rik nginjakko teradisi hijo luwot dilom momen hijo? Induh. Kantu puwari sunyinni wat timbal rik jawapanna say~say.

Sekedar ngingokko gawoh, mulay tano lapah ram iwoh rik perduli jama say gelarni lampung. Induh suku bangsani, bahasa rik budayani, adat sereta kearipanni. Dang angkoh di keduwa kantubang ram kena di kicik betik. Gegoh hani sekiman nulung kuyuk/kaci tesetik. Radu titulung terus ram say digigik.

Lapah ram  nyundut ngelalungkon apuy semangat kelampungan ram. Dang titawar lagi, radu cukup selama hijo ram ngalah rik ngehaman. Dang rabay~rabay lapah ram nyuwarakon tantang lampung. Nini puyang ram yado manusiya~manusiya calak (tangguh). Mak rabay rugi api lagi ki mati. Sejarah ngeni bukti.

Tabik.
Jakarta, 25 agust 2017

TUHAN, AKAL RIK NAPSU cerita buntak bahasa lampung

"TUHAN, AKAL RIK NAPSU"
Agi Semacca Andanant

Buntakni cerita, semangkung tuhan nyani manusiya, tuhan radu nyani mahluk say gelarni akal rik napsu. Seradu jadi sempurna tuhan terok panday repa pendapat rik peYngakuwanni mahluk ciptaanni. Diurawdo say~say.

"Malaykat tulung uraw pay Akal, kayun ya ngehadap sikinduwa." perintah tuhan jama malaykat.

Mak mubeni malaykat ratong jama Akal ngehadap tuhan.

"Tabik tuhanku, ajo Akal ratong ngehadap puhaguk Pusikam" cawani malaykat sambil nyumbahkon diri jama tuhan. Akal juga nutuk nyumbahkon diri.

"Akal...nyak butanya pay di niku tulung jawap, sapa pay diriku sapa munih pay dirimu?" lulih tuhan jama Akal.

"Ampun buribu ampun, mahapko pay sikinduwa. Pusikam yado tuhanku say nyaniko alam semesta jo, say ngandan rik say nguyunkonni. Pusikam kedaw segala. Sedongkon Sikinduwa hambamu say mak ngemik daya rik upaya ki mak dayamu siya tuhanku." timbalni Akal.

"Payu, nerima nihan. Malaykat tulung antakko Akal taru di surega" perintah tuhan jama. malaykat.

Mak mubeni jak hino Malaykat ratong ngehadap barong jama Napsu.

"Ya tuhanku, jo sikinduwa ratong jama Napsu ngehadap pusikam" cawa malaykat sambil nyumbah hormat jama tuhan. Sedongkon Napsu mak nutuk nyumbah api say niguwaykon Malaykat.

"Napsu...nyak butanya pay di niku tulung jawap,   sapa pay diriku sapa munih dirimu?" tanya tuhan jama Napsu.

Jama pungahni Napsu langsung nimbal

"Nyak yado nyak, Niku yado niku".

"Malaykat...usung Napsu luwah jak ija, camburko ya di lom neraka." perintah tuhan jama malaykat.

Kuruk nerakado Napsu ulih sipat pungahni mak ngaku hamba rik mak panday di diri.

Turun radu mubeni di neraka Napsu mansa panggilan luwot jak tuhan. Ulih kantu radu burubah sipat rik pelagutni Napsu selama di neraka. Neraka tisani kenyin mahluk say mak panday di diri mansa pelajaran ulih kekalaw harapanni ki radu jak belajar dapok burubah mit say helaw penakayni.

"Napsu butanya luwot pay nyak, sapa pay nyak sapa pay dirimu?" hani tuhan jama Napsu.

"Nyak yado nyak, niku yado niku." timbal jantutni Napsu haguk tuhan.

Kesol tuhan mari nguraw malaykat.

"Malaykat panjinko Napsu di neraka bagiyan Betoh." perintah tuhan.

"Ya tuhanku." begeluk malaykat narik susutko Napsu nipanjinko di neraka Betoh.

Tecamburdo Napsu di neraka bagiyan betoh. Turun radu cukup beni tipanjin di neraka bagiyan betoh Napsu ngerasa mak budaya, lemoh segala guway rik kelikni. Ujungni ya mulay ngerasa mak nahan ki sememanjang lemoh mak ngedok daya. Tuhan juga ngerasa radu cukup ujianni jama Napsu. Pinsan hinji pasti Napsu mak mungkir rik mak kupur jama tuhan.

"Malaykat....tulung urawko pay Napsu ngehadap Sikinduwa". Perintah tuhan jama malaykat.

"Payu Tuhanku...". Malaykat langsung nunggai Napsu.

Mak mubeni jak isan Malaykat ratong jama Napsu.

"Napsu...butanya pay luwot nyak di niku, sapa paydo nyak sapa paydo niku...?" tanya Tuhan di Napsu.

"Ampun buribu ampun tuhanku. Api hak dayaku ki layin jak dayamu. Liyak gawoh sekati sikinduwa tepanjin di neraka betoh disan sikinduwa santor ingok di kagunganmu. Pusikamdo tuhan sunyin alam, nemah nyak lom kuwasamu....". Hani Napsu sumbah nemah di tuhan

"Payu ki reno. Malaykat antakko Napsu di seruga. Ya radu lulus jak ujiyanku, taganko ya tepik di seruga dilom kagunganku". Perintah tuhan jama malaykat.

Tepikdo Napsu di seruga seradu lulus ujiyanni di neraka bagiyan betoh.n

Jakarta, 08082017

Lirik lagu-lagu daerah Lampung by Semacca Andanant

PULIPANG
Cipt. Erwinardho

Payu bang kita pulipang
Ki sangun sina hagamu
Ku teduh niku mak senang
Ki nyak pubandung di niku

Kita bang pulibang betik
Andanmu wi nyak nerima
Kantu bang wat say ku kanik
Nyak harap wi kilu rila

Reff.

Payah nyak nyambungkon tali
Nyak nyirok niku bang melok
Payah nyak ngesaykon hati
Nyak conggok bang niku digok

Payu ganta nyak bang ngalah
Kenyin hatimu senang
Ku rasa mak jadi salah
Ram jejama nyepok sumang

Payu bang kita pulipang
Gelarni wi mangkung judu
Kantu bang tungga di rangrang
Nyak harap bang kilu tagu

SANG BUMI RUWA JURAY
Cipt. Syaiful Anwar

Jak ujung Danau Ranau
Teliyu mit Way Kanan
Sampay pantay lawok jawo(h)
Pesisir rik Pepadun
Jadi say delom lamban
Lampung say kaya-raya

Ki ram haga burasan
Hujawni pumandangan
Huma lada di pumatang
Api lagi cangkihni
Telambun beruntayan
Tandani kemakmuran

Lampung say...Sang bumi ruwa juray 2x

Canggot bara bulaku
Sumbah jama say batin
Sina gawi adat sikam
Manjaw rik sebambangan
Tari rakot rik melinting
Cirini hulun Lampung

Lampung say...Sang bumi ruwa juray 2x

SALAM SALAM
Cipt. Arifin M

Salam salam ku kirim salam
Lawan niku say radu nantu
Ku kirim salam salam tiram
Saka mak tungga goh say radu
Ku kirim salam salam tiram
Saka mak tungga goh say radu....

Reff.

Salam salam ku kirim salam
Ku tanya kabar api kabarmu
Munyayan sunyin kilu neram
Jama jama ram bukilu

Tiram tiram wi nyak tiram
Induhda ya ki hak niku
Ki mu terima ano gelarna
Waalaykum salam kodo ya haku

Salam salam ku kirim salam
Lawan niku say radu nantu
Ku kirim salam salam tiram
Saka mak tungga goh say radu
Ku kiirim salam salam tiram
Saka mak tungga goh say radu....

Reff.

Kapan kapan masani kapan
Kipak ku liyak sambil nyak liyu
Kipaj jak jawoh mu rilong pinsan
Reno umpama tiramku diku

Ki ya mak berat saya butanya
Kantu wat ubat ampay mu halu
Mak liyu tungga ano kodo ya
Renodo kodo repa pay hamu...

NGIKOK JANJI
Cipt. Arifin M

Radu saka radu saka ku pikir
Angon angon haga pubandung diku
Kidang mula sampay ganta mak juga
Raba watir kantu daikin hamu...

Dang mu sangka dang mu sangka ki jak nyak
Raba raba mak guna cawa si ya
Ki wat niyat cawakondo maksutmu
Ki say betik tantu ya ku terima....

Reff.

Sugih helaw jak saka ku rencaka
Ki ya kena nyak mati di tanganmu
Oh ki rena setuju kodo niku
Dang mu simbat ki lagi ranja ranja

Pikir pikir cuba pay ilingko pay
Tanya tanya say patut rangmu nanya
Ki ya radu sipa say helaw hamu
Tinggal niku ki jak nyak ku terima

Oh ki rena kita ruwa bujanji
Janji repa umpama gegoh repa

Ki nyak way kupi gula rik suduni
Oh nyak cangkir kupi dalih piringni....

NEDOS HATI
Cipt. Iwan Sagita

Ku batok dipa lagi
Nasip say wat di diri
Mak dawah mak debingi
Selalu nedos hati

Miwang mak ngedok guna
Suyaku jama sapa
Mak ngedok hulun tuha
Puwari induh dipa ya

Ku batok dipa lagi....

Reff.

Diri ibarat jukung
Lebon arah tujuwan
Hagaku sepok dipa
Harunganni diriku...

Api nihan ngebani
Mula nyak sampay reji
Kidang payu kayakni
Mak dapok ku pungkiri

Alloh tuhanku robbi tabahkon diriku....

BULAN BARA
Cipt. Faizal H

Bulan bara di tengah bingi
Lawok silum di tegi rani
Niku yu adek panjak di mata
Ki injuk barang inton diwangga..

Sopan santunmu dijaga
Ingok juga nyak di budimu
Niku wi adek panjak di mata
Senyummu dek mak mingan ku lupa..

Reff.

Relom bingi mak pedom
Bayanganmu ngengguda
Lesoh diangon angon
Kapan adek tebinta.....

Bulan bara di tengah bingi
Lawok silum di tegi rani
Niku yu adek panjak di mata
Ki injuk barang inton diwangga..

LAYAW
Cipt. Said Hasimura

Mati sedih hurikmu badan
Selalu tiram dawah debingi
Ngingokkon janji, janji rik rasan
Kapan lagi masani

Bayang bayangmu selalu ratong
Kapan kak waktu ditengah bingi
Nyak pedom minjak diguyang hiwang
Niku dilom hanipi

Reff.

Ku biti biti angonku cadang
Layaw rasani hatiku sinji
Putungga ram ji senangun ralang
Alloh tuhanku robbi

Kekalaw ki ya kedoloran
Cinta suciku anjak lom hati
Jejama ngekilu jama tuhan
Kekalaw rasan jadi...

SAREH
Cipt. Said Hasimura

Sareh sareh layaw hatiku
Sayang sayang di niku selalu
Sareh sareh layaw hatiku
Sasar sasar di niku selalu
Sareh.....

Reff.

Ku liyak haliwawak
Halinumu teliyu
Ku tagu najin sanak
Nyak ngulih ulih niku

Tiram tiram saka ku sandang
Payah payah nyak nahan hati
Angon angon ku melayang
Ki mak ki mak tungga serani
Sareh...

SINDAGURI
Cipt. Arifin M

Kala dinana kala ram tungga
Hatiku layaw andahmu si ya
Ku dipa dipa ku tanya tanya
Payah ngelikut disepok mata

Kidang ya di ya hagani hati
Induh ya ki ya nyak sindaguri
Burung di rimba mit dija dudi
Tindihmu lamon jengan budandi

Reff.

Ano umpama bandingan kita
Niku di awan payah ku jangka
Ano umpama bandingan kita
Niku di awan payah ku jangka

Di angon angon di inda inda
Suya di badan nyak kala kala...

KAMBAS KUDAN
Cipt. Arifin M

Sakik ki tipubiti
Kambas kudan kanginan
Tipukuk ki kak santuk
Pengrambanni bilangan

No ki ya hurik ki ya
Kambas dilambung batu
Layin ki mak nerima
Nasip nimpa diriku

Reff.

Lapok mak jadi genok
Luwang mak jadi kurang
Pari lebon sebiji
Mawat ngeba mu cadang
Pikko nyak dang mu bilang

Kutu di tengah lawok
Seluwang nyayang bintang
Deikin ki mu sepok
Perumman batang gedang

Ikan mayin di gunung
Beruga mayin di way
Say ruwa say mu hitung
Nyak siwa tangih sampay...

SEANDANAN
Cipt Arifin M

Santor juga ku tanya
Ku tanya niku dipa
Tipuramban ki mingan
Guway gantungan nyawa

Haga nyak seandanan
Ki wat selahmu haga
Di lawok tanjung pandan
Ku selom ki wat di ya

Reff.

Ku selom ki wat di ya
Rasani nyak mak milih
Kipak naruhko nyawa
Asal niku dang barih

Ki hamu wayni robok
Mula nyak urung mepoh
Rabaku nutuk humbak
Ngandan gering jak jawoh

Payu ram seandanan
Jejama goh di hati
Kipak ku di mak mingan
Mak lupa ku bebiti....

PUNYANDANGAN
Cipt. Rusli Z

Mak ngedok say umpama
Biti sakikni badan
Tanjur turun di duniya
Ki reji punyandangan

Layin ulih busuya
Bagiyan anjak tuhan
Kidang wi anoda ya
Sakikni punyandangan

Reff.

Lahlawi api daya
Biduk lebon kayuhan
Asing hiluk rik cara
Payah nyapay tujuwan

Kidang wi payu riya
Nyak nunggu kemurahan
Sabar dalih budua
Kekalaw kedoloran...

LAYAW
Cipt. Arifin M

Mak nihan ku sesangka
Budimu ngelawan nyak
Api mula bang riya....
Layaw nyak inday hamu madu bang tuba.....

Layaw hatiku layaw...nakan
Nyak sedih kak tebinta...lawi
Hamu emi bang begaraw
Way racun hamu gula...

Reff.

Lapah di babat wewah
Kejajaw kuruk rimba
Umbak mecoh di tengah
Mawat nihan ku sangka...

Tagan nyak niru kumbang...nakan
Layu kak bela madu...lawi
Gugur jadi kaliyang
Nyin bangik di hatimu...

Mula tejung ku haba...nakan
Puwas nihan bagiyan...lawi
Hiwangku mak ketara
Ya kindo netay jaman....

KUMBANG MELOR
Cipt. Arifin M

Kumbang melor di sumur
Layu dipandang bulan
Mak halok wi rang mu nyomor
Kaliyang titok tumban...

Ratong labung kelabungan
Ratong panas kepanasan
Lebon mak jadi sepoan
Hancur mak jadi habaan...

Reff.

Dang niku salah pilih
Kantu tejang hiwangmu
Bacak ringa say barih
Say seimbang di niku...

Bacak nyak rabay mena
Mak min duwa ki radu
Sesol dang tilibak di nyak
Mak gunani ki radu....

UDI YA
Cipt. Hafizi Hasan

Udi ya....!!!
Dipa ya...???
Udi ya....!!!
Dipa ya...???
Indayan saka teliyu
Ngehilok lapah mak nagu...

Udi ya...!!!
Dipa ya....???
Udi ya...!!!
Dipa ya....???
Udi ya nontong mit dija
Sayangni ya mak haga tungga...

Reff.

Ya Alloh mak kuwawa selalu ku hanipi
Indayan saka saka mak tungga
Sekali tungga mak nagu...

Udi ya...!!!
Dipa ya...???
Udi ya...!!!
Dipa ya...???
Udi ya nontong mit dija sayangni ya mak haga tungga...
Udi ya........

KAPANDO
Cipt. Arifin M

Hiwang mak panday bela
Ku sesolkon di niku
Cadangni jiwa ganta
Janjimu mak ditunggu...

Reff.

Ku sesolkon di sapa
Hinji radu hagamu
Helawni niku cawa
Bang jadi sesolanmu

Mula nyak sampay cawa
Rabay nyesol di niku
Kidang api gunana
Nyesoli barang radu...

TEPIK TANGGUNGAN
Cipt. Hilla Hambala

Lalika di duniya
Labung di tegi rani
Mawat tisangka-sangka
Panas mak togok debi...

Keminan-keminan idang lamban
Ramah ngehalang niku wi lawi adek lawi
Bapak induk mamak tan
Mak ngeni kita temu...2x

Mula-mula nyak tejung andan
Ulih nunggu cawamu wi lawi adek sayang
Mak ku nyana bang resan
Niku wi ngempulaju...2x

Reff.

Ku puradu pilihan...juduku yado niku..2x
Niku ngebubar rasan..janjimu dek mak setunggu...

Tumban-tumbando niku badan
Tikacay mak buradu wi lawi sakikni wi
Cadang lumbung cadang lamban
Ku penahko di niku...2x

Ingok-ingok haku di nana
Enggok hamu ki sungkan wi lawi adek sayang
Nyak milih miwang mena
Jak dipikko tanggungan...2x

Reff.

Nyeberang di way rawang..niku mena nyak duri
Jambat mundur ku sirang..niku dek ngembubar tali...

Tuyun-tuyun nyak lebon kimbang
Netay ranglaya mulang
Dipa kingok niku nyak miwang
Naras nyawa tihabang...2x

RASAN URUNG
Cipt. Hilla Hambala

Selamat tinggal sayang
Ajo ku kirim lagu
Kayak diya ram lipang
Senangun mangkung judu....

Urung ram bulambanan
Say tuhamu mak barong
Bacakda ikin hanan
Ki mak dapok puterong....

Reff.

Ki nandi sorok nihan
Nyak pugiyah jak niku
Lesoh ram manjang jaman
Ingok rambak say radu.....

Kita sekedemonan
mawat kesaka lagi
Kala kita puandan
Injuk mak haga reji....

Kantu payu adik wi
Kayak diya nyak tumban
Taganko ya nyak nyandangni
Layaw injuk luwangan.....

Reff.

Ikin dianggop ereh
Lapah bukekos lagi
Sepok pilihmu barih
Say bukena di kuti....

Ku sambuk rasan urung
Batuy dedalih miwang
Api guna ram bandung
Ki nyak say ngeba nyadang....

WARAH PUTIH
Cipt. Rusli Z

Kepudang ngatot salay
Rareting kayu hara
Sakikku layin ampay...2x
Tinasa togok ganta...

Ku tetay sipa rang-rang
Jambat sipa ku titi
Api cak inggal jimpang..2x
Pagun sakik ku biti....

Reff.

Layin cutik say capu
Say ngojok ngepuambih...2x
Lalikani diriku
Kena di warah putih..2x

Kicik say jadi puluh
Jak cutik dapok lamon
Antakni lagi teduh..2x
Disanik nemon-temon...

Kipak ya haga repa
Mula ya ku puliyu
Mak guna tapan dada...2x
Mak cigani ki haku....

MUSIBAH LAMPUNG BARAT
Cipt. Arifin M


Alam niginjung kukuk
Diperesini bumi
Nyapang jambatan sayuk
Sekimanni puwari........

Lagi dibulan duwa
Tahun sembilan empat
Kukuk di tengah bingi
ngegintor lampung barat
kukuk ditengah bingi
ngegintor lampung barat
cadang sanga negeri

minjak pugapa-gapa
mata miyah tengragat
duniya kelom tumba
injuk haga kiyamat
duniya kelom tumba
injuk haga kiyamat
halok reno kiyamat......

Reff.l

suwara bugemuruh
mak kenantuwan lagi
gedung, lamban so rubuh
pekik hiwang buganti

mula ya gi dinana
mak sepenyinan lagi
nikudo say kuwasa
rang ram nyerahkon diri
hambamu mak budaya
ya allohu ya robbi
nikudo say kuwasa........

turun debingi pagi
umat semapu hingga
ratong jak dija dudi
nulung rik burecaka
ratong jak dija dudi
nulung rik burecaka
mana hawosan mak lagi

manusiya say binasa
radu nyacak ribuwan
ratusan ki say mati
haga mak keuyunan
kidang anoda janji
mak mingan tipubanggan
semapu bagiyanni.......

Reff.ll

dang lupa nyumbah tuhan
nutuk ijahni nabi
mula wat rukun iman
kenyin yakin dihati

wat hadis dalih pirman
rang ram ngaji rik nguji
sina jadi pedoman
jak hurik sampay mati
sina jadi pedoman
jak hurik sampay mati
hani say panday ngaji......

nakukon culuk ruwa
bukilu jama tuhan
kekalaw antak ija
ram ninding percubaan
kekalaw antak ija
ram ninding percubaan
sina jadi ujiyan.........

ANDAHMU

Cipt. Arifin M

Andahmu mula nyak sampay reji

Andahmu lantaran nyak mu sani

Andahmu lagi kurang pastiti

Andahmu mula rena jadini

Andahmu...andahmu...mula cadang muwari

Reff.

Kipak sungkan haga mundur mak mingan

Kipak sorok haga nulak mak dapok

Tihaba ki radu mak buguna

Tihaba sesol mulang di sapa

Si radu ana gelarni radu

Si radu tontongan kak say duri

Si radu sina jengan bukaca

Si radu halok senangun guda

Si radu ana radu jejama ngimankon ya..

DIPULAJU

Cipt Hila Hambala

Bulan disalok riyuk

Wewah kidang mak manda

Burung ku bekom lucuk

Alloh lawi dipa ya

Ki ku pandayi ya reji

Tanjur nyak rindu diku

Sayangku mawat lagi

Diriku dipulaju

Nyak lalang layin senang

Ngelalitawkon hati

Banjir luh rambak hiwang

Hayawanku mak lagi

Nyak kena dipulaju

Miwang nenggarah bulan

Mak kanani ki niku

Tinggal nyak say lawangan

Lipang angonku cadang

Ngebatuy di halinu

Najin bagiku malang

Bukilu nyak mak taru

Ki reji juga hati

Halok laju lawangan

Kidang api gunani

Sina radu bagiyan

SAY LAGI

Cipt. Nuridosia

Say lagi say lagi kiluwanku di niku

Say lagi say lagi harapanku di niku

Angkah say hinji lagi say mangkung kedoloran

Induh kapan masani haga wat kesimpulan

Say lagi say lagi...

Reff.

Ki ulih di hatiku niku dang watir lagi

Mak ngedok ruwa telu si layin anjak niku sayang...

Ibaratni lapahan radu togok duwara

Tinggal pak lima jimpang ram haga bulambanan...

Kapan wi kedoloran...