SANGU BISMILLAH
Hahiwang Semacca Andanant
Hahiwang Semacca Andanant
Lapah sangu bismillah, nyirang kelomni bumi, ngebedak bulan wewah, sayuk niramut pagi, bintang tahun mak mundah, nibulup matarani, umbak mecoh ditengah, karang hancur goh heni, sekati diri mundah, tuwoh di lambung bumi, mangkung kuk panday lapah, nipikkon ina mati, harungan lagi induh, hulun tuha mak lagi, repa hati mak susah, sakik tenemuwan diri, repa mak buginalah, luwoh manjang tehili, kemaraw labung tegah, panas mak togok debi, jambat patoh ditengah, ku tetay ati-ati, laju nyak karom menah, mudur sayuk dibumi.
Kundang kahutku kidah, liwan sayangni diri, radu saka ku penah, say bantal say hanipi, ku andan kipak susah, ku siram debi pagi, badan nyawa ku serah, sepegungan dijanji, nemah nyak hurik susah, asal rasan ram jadi, bang kindo salah penah, hayawanku mak lagi, kundang kahutku kidah, radu mutukkon tali, nyak tepik buginalah, jajaw rasani hati, ya lijung mawat moloh, lapahni togok nanti, ya Alloh masyaalloh, hancur rasani hati, kundang kahutku kidah, niramut anjak hati, dipa adilmu kidah, ki radu gegoh reji, hurik mak nungga kiwah, sakik hiwang buganti, allohu subhanalloh, mati sakikmu diri, tulung hambamu kidah, dang tekas dipuhari, di niku rangku nemah, alloh tuhanku robbi.
Nyak lawang radu tilah, teneraan goh reji, goh angin lebon arah, mak nantu dihagukni, sumbah tulungdo kidah, sambuk duaku lawi, keni hati say tabah, nyandang derita sinji, miwang nyak dalih lapah, riya luhku tehili, tunggak tedoh nyak salah, injuk layin dibumi, bambangan nyak jo kidah, repa lajuku lawi, puwas nasipku kidah, mak gegoh dipuwari, ku bidi cukut lapah, bukimbang pindah sungi, kekalaw nasip rubah, sina niyatni hati, lapah sangu bismillah, nyepok harungan diri, di ranglayamu Alloh, bumi say pana sinji.
Tabik.
Jakarta, 12/11/2013
