Disapa?

Disapa?
sajak Semacca Andanant

nyak midang
bulayar di lawok lepas
umbakni keliwat ganas
hunjak ki badayni mak ngangkon nyak lom inday

disapa nyak bugaga
hulun tuha say ngahutkon nyak mawat ngeliyak
puwari sekelik mak ngangkon kipak cutik
andanan hati mangkung wat nyirok dihati

nyak mak budaya
napas hurikku tinggal cutik
nyemat dihantara cita-cita rik kehaga

jakarta, 31 mei 2013

Lelakun Hurik

Lelakun Hurik
sajak Semacca Andanant

sangun riya hurik
mak genok di say cutik
sipat kurang radu jadi senimbang
ki say bangik ya dapok lupa hurik
ki say malang, ngalah ngaduh bumanjang

sangun riya hurik
mak leka jak say bangik rik sakik
tano ram nungga kiwah
jemoh ram nungga susah
tano badan ram rayang
jemoh badan ram ruyang
tano hurik ram malang
jemoh hurik ram ngambang

bangik rik sakik
bilangni angkah cutik
say melamon mak sukur dilom nikmat

jakarta, 31 mei 20113

Dang lupa

Dang lupa
sajak Semacca Andanant

Ikin mu hiwangi barang say radu terjadi
ikin mu biti lungah cadang goh hati
ki ya say radu ano gelarni radu
kipak tisesoli mak bakal moloh lagi

najin ram lipang nyepok ranglaya sumang
angkonku diku mak lebon jak angonku
kantu telibak disimpangan ranglaya
harapku diku dang lupa mawat nagu

ingok say radu
hanggummu rik hanggumku.....

jakarta, 16 april 2013

Andanant hati

Andanan hati
sajak Semacca Andanant

Andanan hati.........
nikudo tajalku mati
dang mu kira geringku cancanan hada
dang mu nyana hanggumku dihanggan cawa

unggal waktu angangonku yado niku
unggal bingi hanipiku angkah niku
serijop gawoh niku mak diliyak mata
badanku lemoh, hampang hayungan mak budaya

tagan gering ram tuwoh ditengah pulan tuha
dihantara kayu-kayu langgar say ngigaw langik
diredik way tulung sungi dedari mandi
ram seandan sebabangan dihati
ram sekahutan pilih mak balin lagi...

jakarta, 04 april 2013

puisiku

Jam di sesay

Suwara detingni jam di sesay ngeramut hanipiku

Pedomku ampay nihan ngehinokkon mata

Niku ratong ngantakkon hanggummu dibah semu

Nayah cerita say niwarahkon delom rasan

Tunggak-tedoh sasar ngehunjak-hanjaykon hatiku

Ki nandi nyak mak panday di dirimu

Angkah rupa kahutmu say nyalok mataku

Jakarta, 3 mei 2013

Bukilu

“bismillah mula mu jadi

Kun mula mu turun

Hu...mawat bunapsu

Hak...mawat bugerak

Lemoh badan sekaliyan uyakmu...........”

Reno dua rik memmang  say  ku baca dihadapanmu

Tenaway jak tuyuk tamongku

Pakay nundukkon geringmu

Say jalang  rik buwas

Dikala bara kepelok netay dibimbin hati

Sedong nyak dija pudedayu nunggu

Ngeharop wewahmu manjaw dibumi

Nyipak sejar ngebabang hati

Jakarta, 03 Mei 2013