Seluwang nyambang bulan, segok lom matarani, sakik malang bulamban, tisambuk senang hati, sudi radu bagiyan, takdir anjak ilahi, kalaw pagun munyayan, kipak sakik rasani, semapu dicubaan, api lagi muwakni, neram hurik bulamban, ngesayko ruwa hati, mak ngedok kemudahan, selalu salah tanggi, ki mawat seretiyan, nimbang rasa dihati, kenyin wat kelajuwan, sebabangan dihati, tijaga kecawaan, tutuk lakunni diri, dang lupa sepenyinan, asing guway rik gawi, najin wat kesalahan, dang tiakuk pesenggiri, ram perda semahapan, ki wat salah carani, kenyin wat kehangguman, sebabuwa di hati, ram santor setiraman, kipak puredik sungi, angkah niku andanan, tunggal say dilom hati.
Awas kena gudaan, ratong jak kanan kiri, say ngeba jadi haban, nyani ram tabur heni, mak lagi sekahutan, say bantal say hanipi, ralang mulang di lamban, induh dipa ilungni, ikin jadi pakayan, kelakuwan goh sudi, kantu cadang bulamban, hurik ram mak bureti, anak say jadi korban, laju minak muwari, malang nimpa di tiyan, andah lakunni diri, ki mirak di inggoman, sikop gegoh dedari, dang lupa ya tiandan, tibedak tigincuwi, tibalinko pakayan, kanian say bugisi, busenam kebugaran, kenyin hamak badanni.
Titaway kepatutan, nutuk ijahni nabi, kenyin inggom buiman, ngereti dihejongni, ki radu gegoh resan, teduhku mak ki lagi, serugga wat dilamban, kipak cawani nabi, kipak hurik pas-pasan, busukur dilom hati, rasani kiwah nihan, mugandang pawar hati, najin angkah sang panjang, mengan barong emi ngingi, rasani sedop nihan, kipak sambol suwani, yaalloh kalaw nihan, sumbah kilu dihati, sekelik ram munyayan, duniya rik akhiratni, sakinah rik mawaddah, warohmah di unyinni, kalawdo kalaw kidah, sina kiluni diri.
Tabik.
Jakarta, 09 Mei 2012
