TENEMUWAN HURIK
Hahiwang Semacca Andanant
Muhapik rik muridik, gulay tiyung setekan, tikanik cutik-cutik, titokkon ya temadan, musakik nihan hurik, tenemuwanni badan, tikanik kuk say ngelik, nyin mawat kebetohan, ajo ngebiti sakik, malang nihan bagiyan, kusandang anjak lunik, togok balak ku baban, sumang nihan anjak rik, kanca dalih indayan, hurikku liwan sakik, mawat ngedok bandingan, ibarat rakik lunik, tihanyuk di lawutan, harapan ikah cutik, haga nungga labuhan, sakik ki nandi sakik, kidang mak ulah nihan, kidang payudo kantik, ajo radu bagiyan, kapan kak ngeliyak rik, kanca dalih indayan, miwang nyak di hati lunik, malang nasipmu badan, tiyan segala ngemik, mak ngedok kekurangan, asing ulah rik kelik, selalu kedoloran.
Tihanyuk mak burakik, relok dilom batuyan, dipado rangku tepik, say dapok ngandan badan, najin puwari ramik, nyak hurik mak tiandan, kipak ngedok sekelik, nyak tumban kemayangan, sakik ki nandi sakik, tikacay jak babangan, ina bapakku sakik, mula nyak kurang andan, segalani mak ngemik, taru ditengah pulan, bigindom di anjung lunik, badan ngison kanginan, reji ki hurik sakik, unggal rani upahan, nyak miwang ngeliyak rik, kapan kak penayuhan, tan campur di say ramik, nyak segok kuruk pulan, mati sakikku kantik, mak gegoh di inday pangan, kapan kak ngeliyak rik, kala waktu lebaran, tan makay kaway betik, nyak kindo kaway tampalan, tiyan nganik say bangik, nyak betoh payah nahan, tan midor di say ramik, nyak segok mit lom pulan.
Layin tenyanik -sanik, nasip say wat dibadan, kipak hurik musakik, dang lupa jama tuhan, budu'a kipak cutik, kalaw pagun buiman, mahapdo nabik-tabik, kantu wat kesalahan, kalaw nungga say betik, wat hulun say kasihan, nyak diangkon sekelik, dijadiko kayunan, kipak gaji mak ngemik, sejar upahni mengan, tukang kanik emi ngingi, emi bayu jak rangkalan, kantu wat salah kicik, kilu mahapdo nihan, ajo wayak tisanik, batuy dalih bitiyan, nyak batang kayu lunik. huwok sisa tapiyan, tagando ya pak tepik, mawat jadi habaan, bung lunik tuwoh nyetik, dihantarani bamban, mak patut tipukicik, malang nasipni badan, sangun riya ki hurik, semapu dibagiyan, wat kiwah kanjak sakik, pawar segala rasany, jukuk lunik keilik, diipinggiran babatan, bulayar rakik lunik, relok ditengah lawutan, sakikdo liwan sakik, tenemuwanni badan, mahap jama sekelik, kantu mak sekenaan.
Tabik.
Negeri semaka, 29 juli 2011
